Kuarta Semana Oin Reuniaun Dahuluk Lejizlatura Da-Lima

DILI (TATOLI)–Prezidente Parlamentu Nasionál, Aniceto Guterres deside ona iha loron Kuarta (13/06) semana oin, Parlamentu Nasionál sei halo sesaun dahuluk lejizlatura foun nian.
“Nu’udar prezidente sesante parlamentu nian ha’u uza ha’u nia kompeténsia atu marka data, tan ne’e iha 13 Juñu mak abertura lejizlatura foun,” Prezidente Sesante Parlamentár, Aniceto Guterres ba jornalista sira iha parlamentu, ohin.
Nia esplika desizaun ne’ebé nia foti tuir regra la presiza tan halo konfirmasaun ba bankada sira iha Parlamentu maibé kabe ba kompeténsia prezidente parlamentu nian.
Enkuantu, rejimentu parlamentár dehan katak iha 1 to’o 15. Sura loloos hosi proklamasaun rezultadu hosi tribunál monu iha 12 no iha loron tuir mai ka 13 Juñu ita bele halo kedan reuniaun dahuluk.
“Ha’u la presiza konfirma ho bankada ka xefe bankada sira tanba ne’e kompeténsia ha’u nian.” Aniceto reforsa tan.
Hatán kona-bá preparasaun, nia dehan Parlamentu Nasionál agora halo hela ona preparasaun.
Antes ne’e Prezidente Parlamentu IV Lejizlatura Aniceto Guterres promete iha nia prezidénsia sei armoniza produtu lei ne’ebé demaziadu ka deznesesáriu.
“Ha’u hanoin ita nia rain iha ona lei barak tebes, maibé lei sira balun ate ita dehan, demaziadu ka deznesesáriu,” Eis Xefe bankada Fretilín ne’e afirma iha nia diskursu primeiru nu’udar Prezidente Parlamentu IV Lejizlatura, Tersa (05/09).
Nia dehan, presiza tebes halo armonizasaun, no revogasaun ba lei hirak ne’ebé la vale ona, no halo simplifikasaun ba lei sira ne’ebé nia konteúdu kompleksu liu.
“Presiza promove mós kodifikasaun lejizlativa atu halakon lejizlasaun dispersa,” Vice Prezidente Partidu Fretilín ne’e reforsa.
Hodi kontinua fó hanoin katak atu hadi’a kualidade lejizlasaun, inisiativa lejizlativas hotu hosi parlamentu ka hosi governu tenke iha uluk estudu profundu, atu nune’e bele garante konteúdu no justifikasaun ida loloos.
Aleinde ida ne’e, Aniceto mós husu ba deputadu IV lejizlatura sira atu urjentemente revizaun ba rejimentu, ne’ebé aponta ba nesesidade atu halo parlamentu nasionál sai sentru ba debate polítiku, no debate públiku.
Nune’e mós Prezidente Parlamentu Nasionál, Aniceto Guterres promete sei sai Prezidente ba bankada parlamentár lima iha uma fukun no hala’o mandatu ho dignu tuir konstituisaun no rejimentu.
ʺHa’u promete atu sai duni presidente ba parlamentu tomak, la’ós presidente ba bankada ka grupu parlamentár ruma ka koligasaun ruma iha uma fukun ne’e, ha’u sei hala’o mandatu ne’e ho dignu tuir konstituisaun RDTL no rejimentu parlamentu nasionál nian ho independénsia perante bankada parlamentár hotu-hotuʺ, dehan nia iha diskursu bainhira eleitu nu’udar Prezidente PN.
Nia tenik, PN husi ninia própria natureza mak nu’udar órgaun soberania reprezentativu sidadaun tomak feto no mane ne’ebé hela iha rai laran no rai liur.
Alende ne’e, nia mós sei asegura disponibilidade kobertura ba mídia nasionál tantu imprime no eletrónika durante ninia mandatu.
ʺHa’u sei asegura disponibilidade no abertura ba imi ba buat hotu ne’ebé ha’u bele, tuir kbiit ka podér ne’ebé ha’u ihaʺ, promete.
Alende ne’e sei servisu hamutuk ho órgaun soberania sira seluk nó mós administrasaun públika, instituisaun F-FDTL, PNTL, igreja Katólika, konfisaun relijioza sira seluk, universidade, sosiedade sivíl no seluk tan.
Entretantu Aniceto Guterres antes ne’e eleitu nu’udar Prezidente Parlamentu Nasionál ho votus 33 hodi halakon nia adversáriu kandidatu Aderito Hugo da Costa ho votus 32.
Jornalista : Zezito Silva
Editór : Manuel Pinto

