iklan

NASIONÁL, DILI, POLÍTIKA

FRETILIN Lakohi Konkorre ba Vaga Prezidente PN

FRETILIN Lakohi Konkorre ba Vaga Prezidente PN

Deputadu Partidu FRETILIN, Francisco Miranda Branco. Imajen Mídia Palásiu PR.

DILI (TATOLI)–Xefe Bankada Partidu Frente Revolusionáriu Timor-Leste Independente (Fretilín), Francisco Branco, informa partidu Fretilín sei la kandidata nia ema ba Prezidente PN iha lejizlatura da-lima.

“Ha’u re-afirma katak iha sábadu kotuk lideransa partidu Fretilín ho deputadu foun sira hola ona desizaun katak sei la kandidata ema ba Prezidente Parlamentu Nasionál inklui membru meza parlamentár,” Xefe bankada Fretilín ba jornalista sira iha Parlamentu Nasionál (PN), ohin.

Razaun Fretilín la kandidata nia ema ba Prezidente PN, tanba bazeia ba esperiénsia barak ona iha pasadu.

“Ami labele fó komentáriu barak, entaun ami sente katak la presiza kandidata ami nia ema, maibé Fretilín sei sai opozisaun no sei halo krítika no korresaun ba buat balun ne’ebé ezekutivu sira la los.”

Aleinde ne’e ida ne’e, FRETILIN mós promete sei la halo walk out  ba diskusaun sira iha Parlamentu Nasionál.

“Ne’e la los, tanba ita labele halimar ho nasaun no ita kontribui nafatin saida mak di’ak ba nasaun no povu nia futuru.”

Parte seluk, Xefe Bankada Kongresu Nasionál Rekonstrusaun Timor-Leste (CNRT-Sigla Portugés), Arão Noe, afirma to’o agora seidauk iha desizaun finál ba kandidatu Prezidente PN no lista kandidatura AMP nian ba meza PN, maibé iha loraik ne’e lideransa AMP sei reúne hodi foti desizaun ikus.

“Publikasaun iha jornál Timor-Post ohin, ha’u konsidera hanesan illegal, dehan ha’u mak sai Prezidente Parlamentu Nasionál. Publikasaun ne’e mós ho fonte anónimu, la’ós mai hosi AMP rasik nia rejeita.” Arão rejeita informasaun hosi Jornál Timor-Post.

Nia dehan, ema ne’ebé la fó sai nia identidade signifika informasaun ne’e falsa, tanba prosesu sei la’o hela. Ne’e desizaun lideransa másimu nian, tanba partidu hanesan órgaun kolejiál no desizaun hotu koletivu signifika desizaun la’ós kabe ba ema ida ka rua nian.

“Ha’u lakohi fó komentáriu ba ida ne’e “se ha’u mak sai PPN” tanba ne’e kompeténsia ba desizaun nivel altu nian. Maibé hanesan deputadu sempre prontu nafatin atu asume kargu saida de’it. Se kuandu lideransa AMP fó konfiansa mai ha’u atu asume pasta Prezidente PN, ha’u sei la husik monu , ida ne’e ha’u nia prinsípiu.”

Entretantu, aban tuku 10:00, AMP sei aprezenta lista ba PN. Iha lista rua mak lista ida ba Prezidente PN no eleisaun ketak, ka ema dehan pakote rua mak Prezidente PN no vise prezidente rua, sekretaria meza no vise sekretaria rua.

“Rua ne’e tenke separadu tanba Prezidente Parlamentu Nasionál lista únika no lista ida fali sira na’in lima nia naran mak iha hafoin votu,” Arão esplika.

Jornalista : Zezito Silva

Editór : Manuel Pinto

iklan
iklan

Leave a Reply

iklan
error: Content is protected !!