Koligasaun Fahe Malu Iha PN, Estabelese Bankada 8
DILI (TATOLI)- Prezidente Parlamentu Nasionál, Arão Noé hateten lejizlatura da-lima akontese bankada ualu (8) tanba rejimentu parlamentár fó dalan ba koligasaun partidária rua (AMP-FDD) ne’ebé hetan asentu parlamentár, bele halo bankada ketak-ketak.
“Kinta lejizlatura iha ona bankada ualu mak hanesan Fretilín, PD, CNRT, Khunto, PLP, PUDD, UDT no Frente Mudansa tanba rejimentu parlamentár fó dalan,” Prezidente Parlamentu, Arão Noé ba jornalista sira iha Parlamentu Nasionál, ohin.
Arão esplika, koligasaun rua mak hanesan Aliansa Mudansa ba Progresu (AMP) ho Frente Dezenvolvimentu Demokrátiku (FDD) ne’ebé hetan asentu parlamentár iha eleisaun 12 Maiu, ho baze ba rejimentu parlamentár artigu 11 iha alínea 1 to’o 2 husu atu harii bankada keta.
“Lider bankada sira ohin tuir reuniaun, Fretilín husu atu rekorre iha plenária, maibé ida ne’e direitu banka ida-idak nian, hanesan ha’u Prezidente Parlamentu kumpre de’it saida mak hateten iha artigu 11 iha rejimentu parlamentár” nia haktuir.
“Entaun ami aprova, sé rejimentu limita mínimu bankada ida tenke membru na’in rua ka lima, maibé lae, rejimentu la hateten nune’e.”
Jornalista : Zezito Silva
Editór : Manuel Pinto
