DILI (TATOLI) – Prezidente Parlamentu Nasionál (PPN), Arão Noé hateten governu atuál fó ona informasaun mai Parlamentu Nasionál (PN) atu submete programa governu da-ualu nian.
“Informasaun hosi governu nian iha ona atu lori programa mai parlamentu maibé ha’u lakohi hateten tanba ida ne’e kompeténsia governu nian,” PPN, Arão Noé ba jornalista sira iha uma fukun PN, ohin.
Tuir Arão Noé katak atu aprezenta programa governu, ne’e kompeténsia sira nia, la’ós parlamentu nian, maibé infelizmente ami rona ona informasaun kona-ba submisaun programa mai uma fukun ida ne’e.
Hatán ba kestaun ne’e, Ministru Reforma Lejizlativu no Asuntu Parlamentár, Fidelis Magalhães hafoin reuniaun Konsellu Ministru, dehan governu sei kumpre devér tuir konstituisaun haruka atu aprezenta programa governu ba parlamentu.
“Ami sei kumpre devér konstitusionál hodi haruka programa governu ba parlamentu. Konstituisaun dehan iha loron 30 nia laran governu sei kumpre devér hodi aprezenta programa governu,” Arão garante.
Tuir kalendáriu katak iha loron ikus atu hatama programa governu ba parlamentu mak iha loron 22 Juñu, maibé governu sei submete antes.
Kuandu programa ba ona parlamentu fiar katak deputadu sira sei fó apoiu másimu atu nune’e ita bele dezenvolve moris povu nian no nasaun.
“Parlamentu ida ne’e maioria absoluta tanba ne’e programa governu sei hetan lejitimidade, nune’e ita bele lori dezenvolvimentu nasaun nian,” Arão hakotu lia.
Jornalista : Zezito Silva
Editór : Manuel Pinto
