DILI, (TATOLI) – Koru Santa Cecília hosi Parókia Balide, hala’o enkontru ho espoza Prezidente Repúblika (PR), Cidália Nobre Guterres, ho objetivu husu apoiu balun relasiona ho aniversáriu Koru Santa Cecília ba dala 30 ne’ebé monu iha 22 novembru 2018.
“Sira lori sira nia proposta mai Gabinete Espoza Prezidente Repúblika atu husu apoiu ba nesesidade koru nian, maibé ami la promete atu apoiu saida ba sira. Ami sei apoiu tuir kbiit ne’ebé maka gabinete ne’e iha”, Cidália ba jornalista sira iha Palásiu Prezidente Nicolau Lobato, Bairru Pité, kuarta ne’e.
Iha biban ne’e, nia haktuir Koru Santa Cecília mós realiza ona programa formasaun koru iha fatin rua hanesan Munisípiu Ermera no nia husu atu habelar programa ida ne’e ba joven sira iha fatin seluk, liu-liu kona-ba kursu tékniku lian no múzika.
“Ita hatene katak ita nia rain ne’e joven barak maka hatene kanta no gosta kanta maibé presiza iha arte ba lian ninian”, Cidália subliña.
Jornalista: Xisto Freitas
Editora: Rita Almeida
