DILI, (TATOLI) – Prezidente Repúblika, Francisco Guterres Lú Olo, ofisialmente sai patronu ba Uniaun Nasionál Eskuteiru Timor-Leste (UNE-TL) ba períodu 2017 to’o 2022 liuhusi seremónia investidura ne’ebé organiza hosi Gabinete Kaza Sivíl Prezidénsia Repúblika iha Palásiu Prezidente Nicolau Lobato, Bairru Pité, tersa ne’e.
Prezidente Repúblika ho laran haksolok hatán simu kargu nu’udar patronu UNE-TL nian no promete sei promove UNE-TL liuhusi Prezidente Repúblika nia vizita traballu iha mundu no buka atu tulun organizasaun ne’e.
“Ha’u sei buka fó tulun ba organizasaun ne’e tuir dalan oinsá de’it no promove organizasaun ne’e iha rai-laran no rai-liur. Ha’u hein katak ho lala’ok oi-oin, organizadu no ho lideransa di’ak nafatin, ita bele dada tama eskuteiru foun barak liu-tan ne’ebé sei sai sidadaun no lider responsável”, xefe estadu dehan liuhusi ninia diskursu.
Lú Olo rekoñese organizasun ne’e foin harii tinan 13 liu-ba maibé halo ona lala’ok barak ne’ebé hatudu dedikasaun tomak atu eduka labarik no joven sira atu sai sidadaun responsável iha aspetu hotu-hotu liu-liu ba án rasik, família, rai doben Timor-Leste nomós ba komunidade internasionál.
Nia apresia inisiativa UNE-TL ne’ebé maka hala’o atividade hodi halo reflorestasaun ka kuda ai-oan iha fatin balu ne’ebé presiza no atividade ne’e sai mós kompromisu polítika Prezidente Repúblika nian oinsa fó atensaun ba meiu-ambiente no dezenvolvimentu sustentável.
Lú Olo afirma sei hamutuk ho entidade kompetente, inklui organizasaun sosiedade sivíl, hanesan UNE-TL no sira seluk, atu kuda ai-oan tokon ida durante mandatu hanesan kompromisu polítiku hodi fó atensaun ba kestaun sira ne’ebé iha ligasaun ho meiu-ambiente no dezenvolvimentu sustentável.
Hanesan patronu, Xefe Estadu husu ba UNE-TL atu hatutan ninian kompromisu importante sira ba ema seluk atu bele kompriende, maka hanesan halibur povu tomak, sei la haree ba ema ida-idak ninia partidu, ninia estatutu sosiál no ekonómiku, relijiaun, etnia ka rasa, sei sai prezidente hotu-hotu nian no ba ema hotu.
Iha biban ne’e, Prezidente UNE-TL, Idelta Maria Rodrigues, haktuir UNE-TL hetan rekoñesimentu hosi Estadu liuhusi rezolusaun Governu Nú. 25/2015, nu’udar organizasaun nasionál ne’ebé sai mahon ba Movimentu Eskutizmu iha Timor-Leste no organizasaun ida ne’e halibur ninia membru hahú hosi idade lobitu-sira, esploradór-sira, pioneiru-sira, kamineiru-sira no hahú hosi labarik to’o juventude.
Nia esplika UNE-TL sai nu’udar mahon ida atu bele halibur juventude liuhusi mudansa ba karáter oinsá hadomi án rasik, hadomi ema seluk, hadomi nasaun, espíritu nasionalizmu, patriotizmu ho partisipasaun ativa atu promove valór kulturál no morál, karáter voluntarizmu nu’udar moto iha asaun sira.
Idelta hatutan UNE-TL adere ona ba membru mundiál ba dala 167 liuhusi konferénsia mundiál iha Azerbaijan, tinan 2017.
Jornalista: Xisto Freitas
Editora: Rita Almeida
