Bankada AMP Soru-mutu ho PR Ko’alia Lista Pendenti

DILI (TATOLI)—Reprezentante bankada Aliansa Maioria Parlamentár (AMP) kompostu hosi CNRT, PLP, KHUNTO, UDT no Frenti-Mudança, hala’o soru-mutu ho Prezidente Repúblika (PR), Francisco Guterres Lú Olo, ko’alia kona-ba lista kandidatu membru Governu ne’ebé pendenti hela.

“Ami mai ko’alia oituan kona-ba situasaun polítika iha rai laran, liu-liu aprezenta preokupasaun ba Prezidente Repúblika atu kontinua buka solusaun ba kandidatu membru Governu ne’ebé sei pendente hela,” reprezentante bankada AMP, Francisco de Vasconcelos, ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Xefe Estadu Lú Olo.

Vasconcelos esplika Parlamentu Nasionál aprova ona orsamentu jerál Estadu, maibé nia implikasaun ba pasta balun ne’ebé maka sei mamuk hela, tanba ne’e, Parlamentu tenke mai ko’alia ho Prezidente para buka solusaun.

Solusaun ba problema ne’e, tuir nia, tenke liuhusi diálogu, maibé atu halo substituisaun ka lae ne’e kompeténsia Governu nian.

“Ami nia sujestaun ba líder sira maka tenke kontinua diálogu. Diálogu maka dalan úniku atu hetan solusaun. Laiha problema ida ne’ebé laiha solusaun. Timor-Leste hatudu tiha ona nia kapasidade hodi jere problema hotu-hotu,” nia esklarese.

Vasconcelos haktuir, Prezidente Repúblika disponível ka prontu buka solusaun ba kualker problema ne’ebé maka mosu.

Nia informa katak enkontru ho Prezidente Repúblika la’ós de’it ko’alia kona-ba situasaun polítika maibé hato’o mós votus parabéns ba Xefe Estadu ne’ebé halo tinan ba dala 64 iha semana kotuk.

Jornalista: Xisto Freitas

Editór : Manuel Pinto