DILI, (TATOLI) – Primeiru-Ministru (PM), Taur Matan Ruak, deklara difisil ba Governu atu ezekuta Orsamentu Jerál Estadu (OJE) 2018 tuir meta, tanba tempu efetivu atu ezekuta OJE refere iha fulan rua ho balun de’it.
Taur esplika insialmente OJE 2018 ne’e ba fulan haat ho esperansa promulga sedu, maibé la konsege.
“Inisialmente OJE 2018 ba fulan haat maibé setembru ne’e ita tau tiha ba orsmentu duo-désima, signifika ita iha de’it fulan tolu (outubru-dezembru)”, dehan Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru regulár ho Prezidente Repúblika, Francisco Guterres Lú Olo.
Nia afirma: “Iha fulan tolu ne’e realidade ezekusaun ne’e fulan rua ho balun de’it, tanba 15 dezembru ezekusaun taka ona. Tanba ne’e, imposível Governu ezekuta OJE ne’e to’o hotu”.
Taur Matan Ruak haktuir enkontru ho xefe estadu alende ko’alia OJE 2018, ko’alia mós OJE 2019 nian no relata oras ne’e Governu halo hela preparasaun.
Taur akresenta tuir lei Governu aprezenta proposta lei OJE 2019 ba Parlamentu Nasionál (PN) iha 15 outubru maibé sei la akontese tanba foku ba ezekusaun OJE 2018 no sei lori ba PN iha novembru oin mai.
Iha OJE 2019 ho montante billiaun $1.3 ne’e, nia dehan Governu kontinua absorve ba área infraestrutura hanesan estrada, falta bee-moos no eletrisidade no sei investe maka’as fali iha área sosiál bainhira rezolve ona infraestrutura ne’ebé menus.
Jornalista: Xisto Freitas
Editora: Rita Almeida
