ATSABE,(TATOLI)-Komunidade Suku sia iha Postu Administrativu Atsabe, Munisípiu Ermera to’o oras ne’e seidauk asesu liña eletrisidade. Enkuantu, komunidade iha Postu Administrativu Letefoho mós enfrenta problema hanesan.
Administradór Postu Administrativu Atsabe, Manuel Soares Araújo levanta problema ne’e liuhosi sekretáriu Estadu Komunikasaun Sosiál, Merício Juvinal dos Reis Akara, kuarta horisehik iha Atasabe.
“Problema ne’ebé mak komunidade enfrenta maka primeiru eletrisidade, bee moos no estrada iha tempu udan labele asesu transporte ba suku, “Nia informa.
Postu Administrativu Atsabe iha suku 12, aldeia 59 ho total populasaun hamutuk rihun 23.348 maibé hosi númeru populasaun ne’e maioria seidauk asesu eletrisidade. Suku tolu eletrisidade tama kompletu no suku ualu ahi seidauk tama kompletu tanba ne’e komunidade ezije mak eletrisidade.
Komunidade mós susar ba bee moos, maski iha área saúde, Governu harii ona postu saúde 1 no sentru saúde tolu iha Suku Leimea Leten, Suku Laubonuk no Lasaun, maibé presiza aumenta karreta ambulánsia tanba iha de’it karreta ida.
Iha Parte seluk, Administradór Postu Administrativu Letefoho, Julio Marito de Deus hateten, estrada, eletrisidade no bee mos. Iha ona database ba planu munisipál hodi rekolla dadus kona-ba problema estrada rural, bee no eletrisidade ba postu refere kompostu hosi Suku ualu.
Suku Lauana maka maioria asesu ona eletrisidade, enkuantu restu metade seidauk asesu. Suku balun iha aldeia ida to’o rua maka asesu, maibé barak seidauk asesu, Suku Hatugau eletrisidade seidauk tama.
Hatán ba preokupasaun, Sekretáriu Estadu Komunikasaun Sosial, Merício Juvinal dos Reis Akara responde sei tranzmite ba Primeiru Ministru Taur Matan Ruak hodi tau iha planu orsamentu durante tinan 5.
“Ha’u sei tranzmite preokupasaun hirak ne’e ba ita nia primeiru Ministru,“ Akara promete.
Jornalista:Agapito dos Santos
Editór : Manuel Pinto
