DILI, (TATOLI) – Ministru Reforma Lejislativa no Asuntu Parlamentár, Fidelis Leite Magalães, dehan atu sosa asaun Shell ho milliaun $300 ka porsentu 26,6, ne’e depende ba proposta adisionál hosi deputadu sira iha Parlamentu Nasionál iha ámbitu debate Orsamentu Jerál Estadu (OJE) 2019.
“Situasaun hola asaun Shell depende ba proposta adisionál deputadu sira, sira sei koloka iha ne’ebé, ida ne’e sira nia kompeténsia”, Ministru Fidelis ba jornalista sira iha uma fukun, ohin.
Mezmu osan atu sosa asaun sira bele barak maibé governu la haluha hodi investe nesesidade povu nian. Tanba iha proposta orsamentu ita iha investimentu ba bee moos, estrada rurál, eletrisidade, saúde, agirkultura no seluk tan, maske ho porsentu kiik.
“Ha’u la konkorda katak governu haluha tiha investimentu sira ne’ebé importante ba povu nia moris lorloron, mezmu iha porsentu kiik, tanba ita iha nesesidade agora atu hasai osan no investe hodi hola asaun sira”, afirma.
Enkuantu, foin lais reprezentante espesiál governu nian, Kay Rala Xanana Gusmão, ho empreza petrolifera Shell asina akordu hodi sosa no faan partisipasaun asaun empreza ho porsentu 26,6 ho montante milliaun $300, nune’e mós sosa asaun ConocoPhillips ho valór milliaun $350.
Jornalista: Zezito Silva
Editora: Rita Almeida
