Top

Proposta Redusaun Ba Orsamentu Serbisu Profisionál iha MEKAE La Pasa

Primeiru-Ministru hamutuk ho ninia membru sira iha debate proposta lei OJE 2019, iha uma fukun. Imajen António Goncalves

DILI, (TATOLI) – Proposta númeru 17 hosi deputadu bankada Frente Revolusionária Timor-Leste Independente (FRETILIN), Antoninho Bianco, no deputadu bankada Partidu Demokrátiku (PD), Adriano do Nascimento, kona-ba redusaun orsamentu ba serbisu profisionál sira iha Gabinete Ministru Estadu no Koordenadór ba asuntu Ekonomia (MEKAE) la pasa.

Proposta refere hetan votus a favór 24, kontra 38 no abstein  3. Iha proposta ne’e, deputadu proponente sira hakarak redus montante mill $200 hosi dotasaun inisiál mill $530 tanba antes ne’e iha orsamentu jerál Estadu (OJE ) 2018 iha rúbrika serbisu profisionál sira aloka orsamentu ho montante mill $591 maibé iha audiénsia la aprezenta rezultadu katak serbisu saida maka halo ona.

“Iha OJE 2019 iha rúbrika ne’ebé hanesan ministru hakarak aloka mill $530 ba serbisu profisionais. Ami la hetan informasaun hosi Governu kona-ba asesór timoroan no internasionál na’in hira no atu selu ho osan hira. Tanba ne’e, ami propoin halo redusaun mill $200”, kestiona deputadu proponente, Antoninho Bianco, liuhusi diskusaun espesialidade ba orsamentu Ministrériu Koordenadór asuntu Ekonómiku iha plenária Parlamentu Nasionál, sesta ne’e.

Iha biban ne’e, Ministru Prezidénsia Konsellu Ministru, Agio Pereira, ne’ebé tutela ba ministériu ne’e justifika katak iha tinan 2019, MEKAE sei rekruta asesór nasionál na’in lima, asesór internasionál na’in tolu no selu funsionáriu rekrutadu hamutuk 18.

Nia esplika sira rekruta asesór ne’ebé iha espesialidade ba elaborasaun no análise ba kontratu sira no investimentu nomós rekruta espesialista ida ba área ekonomia atu fó apoiu ba MEKAE nia kna’ar, tanba MEKAE iha responsabilidade boot ba setór privadu no setór públiku.

Maske nune’e, deputadu Bianco hateten Ministru Koordenadór ne’e ministru ida ne’ebé lahó pasta, tanba ninia pasta maka iha ministériu sira seluk ne’e, tanba ne’e labele tau osan barak iha ministru refere.

“Organigrama ida ministru lahó pasta ne’e labele tau osan barak no asesór barak. Aleinde ne’e, ministru nia esplikasaun ne’e barak maka asuntu polítiku fali maibé la’ós ba tékniku”, nia dehan.

Entretantu, orsamentu ba ministériu ne’e pasa ho votasaun a favor 41, kontra 3 no abstain 20. Verba mak montante $923.000, kompostu hosi orsamentu ba saláriu no vensimentu $203.000, bens no serbisu $720.000, maibé transferensia públika, kapitál menór no kapitál dezenvolvimentu, zero.

Jornalista: Xisto Freitas

Editora: Rita Almeida

Publisidade

Leave a Reply

Latest Post

error: Content is protected !!