Akademista Husu PR Tetu OJE 2019, Se Veta Implika Ba Sidadaun

DILI (TATOLI)—Reitór Universidade da Paz (UNPAZ), Lucas da Costa, husu ba Prezidente Repúblika (PR) atu tetu didi’ak orsamentu jerál Estadu (OJE) 2019 molok promulga ka veta.
Tuir Lucas katak bainhira Xefe Estadu veta OJE 2019, sei implika ba sidadaun sira tanba sidadaun barak sei dada iis naruk iha tempu naruk nia laran.

“Kuandu veta estudante sira labele selu propinas, labele selu kos, labele tuir ezame no tenke fila hotu ba foho para halo to’os no natar. Entaun, bainhira maka rai ida ne’e la’o ba oin se ita forma ema matenek maibé ema labele eskola tanba osan laiha,” akademista ne’e ba jornalista sira iha Palásiu Prezidente Nicolau Lobato, Bairru Pité, tersa loraik (8/01), bainhira hamutuk ho nia maluk akademista sira seluk hato’o opiniaun ba Prezidente Repúblika, Francisco Guterres Lú Olo, kona-ba OJE 2019.
Lucas informa katak OJE ba tinan ida ne’e boot tanba Timor-Leste hakarak sosa asaun hosi kompañia exploradór mina no gás, Conoco Philips no Shell, maibé karik la sosa asaun, entaun montante OJE ne’e ki’ik hanesan tinan-tinan.
Fundadór UNPAZ ne’e haktuir, Prezidente Repúblika la dehan veta ka promulga maibé aspirasaun sira ne’ebé parte hotu-hotu hato’o, liu-liu lori sidadaun sira nia hakarak, nia (PR) anota hela molok hasai desizaun ba OJE 2019.
Entretantu, akademista sira husi Universidade Nasionál Timor-Lorosa’e (UNTL), Institute of Business (IOB), Universidade de Dili (UNDIL), Institutu Canossa no João Mariano Saldanha University, rekomenda mós ba Prezidente Repúblika atu bele fasilita diálogu entre líder sira atu hetan konsensu hodi ultrapasa impase polítiku ne’ebé nasaun enfrenta.
Jornalista: Xisto Freitas
Editór : Manuel Pinto

