iklan

DEFEZA, SEGURANSA

Japaun Promete Kontinua Apoia F-FDTL

Japaun Promete Kontinua Apoia F-FDTL

Majór Jenerál Lere Anan Timur, kaer liman ho forsa militár Japaun, Tanente Jenerál Takashi Moto Matsu. Imajen António Goncalves

DILI, (TATOLI) – Hodi profesionaliza liután instituisaun FALINTIL-Forsa Defeza Timor-Leste (F-FDTL), governu Japaun kompromete kontinua apoiu formasaun rekursu umanu hodi dezenvolve instituisaun ne’e.

Xefe Estadu Maior, Majór Jenerál Lere Anan Timur hato’o prontidaun governu Japaun nian bainhira hasoru malu ho Komandante Forsa Militár Japaun, Tanente Jenerál Takashi Moto Matsu, ohin iha Kuartel Jerál Fatuhada.

“Japaun prontu nafatin atu suporta ita nia instituisaun, dezenvolve ba profesionalizmu, ohin nia hatete di’ak liu ita loke kursu lian-Japaun para bainhira haruka ita nia ema ba ne’e fasil, nune’e mos kursu inglés, kursu Korea atu haruka ita nia ema ba nasaun sira ne’e fasil”, dehan.

Iha 2017, Japaun oferese ona formasaun ba ofisiál sira kuaze 20 iha akademia militár Japaun no balun konsege remata no fila ona hodi hala’o servisu iha insitutisaun forsa defeza.

Lere optimista sei harii akademia militár iha nasaun hodi fasilita formasaun rekursu umanu ba membru no ofisiál sira hodi labele kontinua dependénsia formasaun hosi nasaun sira iha rai-liur.

Instituisaun FDTL estabelese ona kooperasaun militár ho nasaun besik 25 kompostu hosi Amérika, Portugal, Austrália, Nova Zelándia, Brazíl, Xina, Korea, Japaun, Indonézia no nasaun seluk iha mundu to’o ohin, hafoin instituisaun ne’e hamrik iha fevereiru 2001.

“Ita iha kooperasaun militár kuaze 25 nasaun, prioridade ne’ebé ha’u fó maka kapasitasaun rekursu umanu, formasaun ba ofisiál sira atu iha futuru bele kaer instituisaun ne’e ho di’ak no professionál bainhira ami sai”, tenik.

Problema lian maka sai obstaklu ba instituisaun atu aseita kooperasaun ho nasaun sira hodi haruka ofisiál sira tuir formasaun iha rai liur.

“Tanba ne’e ami esforsu hela kuandu atu ba Japaun tenke aprende lingua-Japaun, ba Xina tenke lian-Mandarin, ba Austrália tenke lingua inglés, no lingua portugés”, realsa.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!