DILI, (TATOLI) – Organizasaun ba Kooperasaun no Dezenvolvimentu Ekonómiku (OECD-sigla inglés), ohin aprezenta relatóriu revista kona-ba roteiru orsamentu futuru sustentável ne’ebé organizasaun ne’e halo iha tinan kotuk ba Primeiru-Ministru, Taur Matan Ruak, iha Palásiu Governu.
Koordenadora ba Unidade Planeamentu Monitorizasaun no Avaliasaun (UPMA), Gabinete Primeiru-Ministru, Brigída Soares, hatete hosi rezultadu ne’e maka rezulta atualizasaun ne’ebé unidade halo ba komisaun reforma jestaun finanseira no reforma fískál atu sai ida de’it iha futuru.
Atu konkretiza polítika governu hodi tau hamutuk komisaun rua ne’e sai ida de’it maka sei iha konferénsia nasionál ida hodi konvida peritu internasionál sira hanesan Banku Mundiál, Banku Dezenvolvimentu Azíatiku (ADB), Fundu Monetáriu Internasionál (IMF-sigla inglés), no OECD hodi halo aprezentasaun ba jestór governu hosi nivel diretór jerál no sekretáriu jerál liuliu iha kontestu estratéjiku fiskál ne’ebé governu presiza adopta ba futuru.
“OECD nia prezensa iha ne’e atu asegura katak revista sira ne’ebé halo ona iha tinan kotuk bele informa fali ba audénsia para hatene saida maka ne’e no bele akomoda informasaun no sira hotu iha roteiru ida deit”, dehan nia bainhira akompaña aprezentasaun servisu hosi Adjuntu ba Xefe Orsamentu no Dezenvolvimentu Despeza Públika OECD, Fransa, Andrew Blazey, ba Primeiru-Ministru.
Hosi rezultadu aprezentasaun ne’e, OECD ne’ebe lokaliza iha Fransa sujera ba Governu hodi foku liu estrutura ba despeza médiu ne’ebé liga ho planu tinan lima–lima.
Alende planu anúal liuhosi resultadu implementasaun programa sira hodi hadi’ak di’ak liután. Entretantu, konferesia nasionál ne’e sei realiza iha edifisiu ministériu finansa durante loron rua hahú loron 14 to’o 15 fevereiru.
Jornalista: Agapito dos Santos
Editora: Rita Almeida
