Primeiru-Ministru Agradese Xefe Estadu
DILI, (TATOLI) – Primeiru-Ministru, Taur Matan Ruak, hato’o agradesementu ba Prezidente Repúblika, Francisco Guterres Lú Olo, tanba promulga ona Orsamentu Jerál Estadu (OJE) 2019.
“Aproveita oportunidade ne’e hato’o agradesementu ba Xefe Estadu kona-ba promulgasaum orsamentu jerál Estadu 2019 no ami garante ba Prezidente Repúblika katak Prezidente Repúblika nia preokupasaun ami rejista no sei mellora implementasaun OJE”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Prezidente Repúblika.
Nia haktuir oras ne’e Governu halo hela preparasaun atu ezekuta OJE ne’ebé promulgadu iha fulan ida ne’e nia laran.
“Foin dadauk ami desidi atu avansa orsamentu duo-désimu iha fevereiru nia laran no iha loron ne’e duni bainhira ami desidi, Xefe Estadu mós promulga. Entaun, orsamentu duo-désimu hela ba inválidu”, afirma Taur.
Maske OJE promulgadu maibé kandidatu membru Governu ne’ebé pendente seidauk simu pose, Xefe Governu hatán ne’e maka kestaun ida ne’ebé sei ko’alia ho Prezidente Repúblika para bele hetan solusaun.
Jornalista: Xisto Freitas
Editora: Rita Almeida
