DILI, (TATOLI) – Sekretáriu Estadu ba asuntu Antigu Kombatente Libertasaun Nasionál no Veteranu, Gil da Costa Monteiro Oan Soru, hateten seidauk iha lei atu defini veteranu ne’ebé puru no la puru.
“Agora dadauk ha’u seidauk iha estimasaun kompletu”, nia dehan ba jornalista sira iha Palásiu Prezidente Nicolau Lobato, Bairru Pité, foin lalais ne’e, hafoin enkontru ho Prezidente Repúblika, Francisco Guterres Lú Olo, kona-ba komemorasaun Loron Nasionál Veteranu iha 3 marsu.
Gil haktuir iha 2011, nia rasik inklui iha ekipa selesaun ba dezmobilizasaun FALINTIL tinan 24 funu iha ai-laran no iha selesaun ne’e konsege identifika veteranu sira ne’ebé luta to’o tinan 24 ne’e hamutuk ema 93 de’it.
“Ne’e atu ko’alia de’it kona-ba dedikasaun tinan 24 iha ai-laran ho nia klasifikasaun durasaun maibé lei ne’e seidauk hateten ida ne’ebé maka puru, tanba ita mai hosi frente tolu maka hanesan Frente Armada, Frente Klandestina no Frente Externa. Atu defini Frente Armada, Klandestina ka Diplomátika maka puru ne’e lei seidauk hateten”, nia esplika.
Kona-ba falsifikasaun dadus veteranu, governante ne’e hatán nia parte sei kria métodu oi-oin para fó resposta ba preokupasaun kona-ba falsifikasaun sira ne’ebé iha no la signifika ida ne’e de’it bele hetan ninia susesu kuandu ema seluk la kontribui.
“Husu ba ema hotu tenke kontribui atu bele fó resposta ba falsifikadór sira ne’ebé falsifika dokumentu atu bele hetan benefísiu hosi falsifikasaun ida ne’e”, Gil apela.
Entretantu, nia tenik, enkontru ho Prezidente Repúblika, Francisco Guterres Lú Olo, ko’alia kona-ba selebrasaun Loron Nasionál Veteranu ne’ebé monu iha 3 Marsu.
Nia afirma Prezidente Repúblika maka sei diriji loron refere, tanba ne’e maka nia mai ko’alia ho Prezidente Repúblika atu hatene karik iha ajenda alternativa ruma hosi Prezidénsia Repúblika relasiona ho komemorasaun ne’e.
Gil esklarese sekuénsia hosi seremónia ne’e maka hanesan sei halo misa agradesementu iha Jardin Eroi Metinaro iha 1 marsu.
Loron 2 marsu sei iha semináriu boot ida iha Sentru Konvensaun Dili (CCD-sigla portugés), no loron 3 marsu sei hasa’e bandeira iha Palásiu Governu no hafoin hasa’e bandeira sei halo marsa mai iha CCD hodi partisipa animasaun ruma.
Governu sei konvida veteranu hamutuk 20 hosi Austrália atu partisipa iha eventu ne’e nomós Konvida estudante sira hosi universidade inklui eskola sekundária balun nune’e bele transmite tutan istória pasajen rezisténsia ba jerasaun sira sira seluk.
Jornalista: Xisto Freitas
Editora: Rita Almeida
