Presiza Diploma Ministeriál Hodi Implementa Dekretu Lei Ijiene-Órden Públika

DILI, (TATOLI) – Ministru Administrasaun Estatál en ezersísiu, Abílio José Caetano, hatete dekretu lei 33/2008 sobre ijiene no órden públika seidauk bele implementa tanba atu fó sasaun ba infratór sira ne’ebé so’e lixu arbiru tenke iha dekretu implementadór ida.
Tanba ne’e presiza diploma ministeriál ida hodi bele implementa dekretu lei ne’e.
“Ami ko’alia ona hamutuk ho administrasaun Dili, problema sé maka atu superviziona ida ne’e. Pur ezemplu iha dekretu lei ne’e hatete ha’u so’e (fo’er) arbiru ha’u multa hanesan ne’e. Agora ha’u so’e arbiru, sé maka bele haree ida ne’e dehan mai lai ó selu multa. Ida ne’e maka ami sei estuda hela”, ministru katak iha kampu sentrál Universidade Nasionál Timor Lorosa’e, kinta ne’e.
Tanba ne’e administrasaun Dili sei haree hamutuk ho Ministériu Administrasaun Estatál ho PNTL oinsá superviziona ema ne’ebé so’e arbiru lixu depois kona multa ne’e.
Iha parte seluk hatán kona-ba separasaun lixu bainhira abitante ida so’e, ministru dehan dezde uluk kedan Organizasaun Naun Governamentál halo ona, maibé laiha koordenasaun ho Munisípiu Dili entaun maluk sira ne’ebé iha Dili ne’e lahalo tuir separasaun lixu ne’e.
“Maibé agora iha pilotu ida iha suku Motael, parese atu alarga tan mai suku Kaikoli, ne’ebé iha ne’ebá haree fatin lixu iha kór tolu, felizmente populasaun parese halo tuir tanba fatin lixu ne’e sira labaku rahun, laestraga, ida ne’e di’ak ona”.
Mas fatin ne’ebé tau ne’e dalaruma lasufisiente, maibé ida ne’e komesa eduka no sosializa ita-nia povu oinsá dixiplina hodi halo dezagregasaun. “Ita to’o bá tenke so’e tuir modelu dezagregasaun ne’ebé ema hanorin ita”, katak.
Jornalista: Maria Auxiliadora
Editora: Rita Almeida

