iklan

NASIONÁL

PN Seidauk Simu Resposta Husi TR Kona-ba LAP

PN Seidauk Simu Resposta Husi TR Kona-ba LAP

Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, (TATOLI) – Prezidente Parlamentu Nasionál (PPN), Arão Noe, hatete nia parte seidauk hetan resposta husi Tribunál Rekursu kona-ba desizaun ikus fiskalizasaun abstrata ba Lei Atividade Petrolífera (LAP), ne’ebé hato’o husi deputadu opozisaun nain 23 iha loron 30 janeiru.

“To’o agora ami seidauk simu karta ruma husi Tribunál Rekursu, ami hakarak husik kada orgaun hala’o nia knaar, no saida de’it mak tribunál haruka mai, parlamentu sei pronúnsia tuir ninia kompeténsia”, tenik ba jornalista sira iha uma fukun, ohin (4/3).

Entretantu ohin loron hanesan loron ikus iha loron 25 nia laran, atu TR foti desizaun ikus kona-ba inkonstitusionalidade ba LAP, ne’ebé PN hatan ona notifikasaun TR iha loron 8 fevereiru no iha loron ne’ebá PPN dehan PN konsege kumpre notifikasaun antes loron 10 nia laran, tanba notifikasaun ne’e rasik  mai iha loron 31 janeiru.

“Parlamentu hato’o ona resposta iha sesta (8/2) loraik no antes tuku 6 loraik Tribunál Rekursu simu ona resposta, tanba ne’e ita hein desizaun. Normalmente Tribunál Rekursu iha tempu loron 25 nia laran hodi pronúnsia”, tenik PPN ba jornalista iha loron 11 fevereiru.

Tuir PPN bainhira lei ida em vigór hela, TR halo apresiasaun no  nunka iha desizaun dehan lei ida inkonstitusionál totál, maibé deklara artigu ida ou alinea ida de’it.

Por em quanto sei iha desizaun ida, governu sei implementa no  kuandu hahú husi Tribunál Rekursu nia desizaun sai mak iha inkonstitusionalidade hanesan artigu ou alinea ida mak laiha efetu, más sira seluk sei la’o nafatin no  laiha problema kona-ba legalidade. Artigu ou alinea ida laiha validade iha tempu ne’ebé tribunál deklara, la’os nia retroativu fali ba kotuk”, katak.

Alterasaun LAP rasik, konsege hetan apresiasaun dala rua iha PN, tanba alterasaun dahuluk hetan veta husi PR, Francisco Guterres Lú Olo.

Durante apresiasaun dahuluk ba proposta alterasaun ida ne’e, deputadu sira husi partidu opozisaun levanta kestaun kona-ba relevánsia, legalidade no blokea hasoru sistema transparénsia Estadu nian.

Entretantu bainhira Tatoli tenta halo konfirmasaun ba Prezidente Tribunál Rekursu iha loraik ne’e, maibé la disponivel fó informasaun.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!