DILI, (TATOLI) – Komandante Polísia Nasionál Timor-Leste (PNTL), Júlio da Costa Hornay, haktuir kazu arte marsiál iha semana rua ikus ne’e redús ona hafoin implementa operasaun koordenada entre forsa armada no PNTL.
“Ita hein katak juventude kumpriende ida ne’e para lalika involve án beibeik ba arte marsiál hodi kria instabilidade”, Hornay ba jornalista sira iha Palásiu Prezidente Nicolau Lobato, Bairru Pité, kinta (7/3), hafoin relata situasaun seguransa ba Xefe Estadu, Francisco Guterres Lú Olo.
Nia husu labele tanba operasaun koordenada ne’e maka redús problema maibé joven sira tenke konsiénsia katak átu ne’ebé aplika iha komunidade nia leet ladi’ak.
“Ladi’ak tanba ita rasik kria problema iha ita-nia suku halo impedementu ba prosesu dezenvolvimentu. Di’ak liu maka nu’udar timoroan mai ita koopera malu. Timor ne’e ita-nian no di’ak ka aat ita maka iha Timor”, Komandante Jerál PNTL ne’e subliña.
Nia katak fatin ne’ebé PNTL identifika sai risku ba problema maka Hudi-Laran, Manleuana, Mascarinhas, Taibessi no fatin seluk tan.
Hornay hatutan operasaun koordenada ne’e sei la’o nafatin no karik bele sei aumenta efetivu kuandu akontese problema grave.
Jornalista: Xisto Freitas
Editora: Rita Almeida
