DILI, (TATOLI) – Ministra Finansa en ezersísiu, Sara Lobo Brites, informa Ministériu Finansa (MF) fó ona instrusaun ba Banku Sentrál Timor-Leste (BSTL) kona-ba transferénsia osan atu sosa asaun ConocoPhillips no Shell ho montante millaun $650.
“Tanba ita serbisu ne’e husi parte tolu, Ministériu Finansa, Banku Sentrál ho Timor Gap. Parte Ministériu Finansa konklui ona, fó ona orden ba Banku Sentrál, daudaun Banku Sentrál ho Timor Gap estabelese hela akordu entre sira, mas ha’u fiar katak sira to’o ona iha konkluzaun no sei transfere iha semana ne’e nia laran”, Sara ba jornalista sira iha Palásiu Governu hafoin reuniaun Konsellu Ministru, ohin.
Sara afirma tuir mekanizmu serbisu ne’ebé maka estabelese, Banku Sentrál sei transfere uluk montante ne’e ba Timor Gap depois sira prosede transferénsia ba ConocoPhillips ho Shell.
“Modelu halo transferénsia, Banku Sentrál jere Fundu Mina-rai hanesan jestór operasionál, pur tantu nia modelu transferénsia ne’e depois hetan ona instrusaun husi Ministériu Finansa sira sei halo transferénsia bazeia ba regra interna ne’ebé aplika iha Banku Sentrál”, ministra en ezersísiu ne’e dehan.
Tanba osan Mina-rai ne’e iha Banku Federál iha Nova Iorke, Estadu Unidu Amérika (EUA), maka BSTL sei komunika ba Banku Federál hodi informa katak presiza halo transferénsia ho montante ne’e ba konta ida ne’e no MF fó tiha ona instrusaun ba BSTL.
To’o notísia ne’e hatún TATOLI seidauk konfirma ho BSTL no Timor Gap sobre transferénsia osan ida ne’e.
Jornalista: Maria Auxiliadora
Editora: Rita Almeida
