DILI, (TATOLI) – Governu liuhosi Ministériu Saúde no Ministériu Edukasaun, ohin selebra loron mundiál saúde orál tinan ne’e hamutuk ho estudante sira hosi eskola bázika filiál Kamea, Munisípiu Dili, atu oinsá prevene moras nehan.
Responsavel Saúde Orál munisipiu Dili, Ana Maria Soares Fernandes, hatete selebrasaun loron mundiál saúde tinan ne’e, ministériu saúde selebra iha postu administrativu Laklo, Munisípiu Manatutu, no Dili tanba ne’e membru governu sira la partisipa iha kapitál.
“Promosaun saúde orál ne’e ami hala’o programa abitúal ida ba sentru saúde sira ne’ebé hala’o nu’udar asaun hodi prevene moras nehan”, dehan nia iha diskursu bainhira reprezenta ministériu ba selebrasaun ne’e.
Nia dehan família barak dala-barak laiha koñesimentu kle’an kona-ba maneira kose nehan, tanba ne’e hamosu moras nehan hodi akontese ba labarik no mós adultu sira.
Iha biban reprezentante kompañia unilever no Lisun Timor-Leste, Flávia da Costa Rosa, hatete programa ne’e hetan kolaborasaun entre kompañia ho ministériu edukasaun no saúde no mós parseiru dezenvolvimentu seluk hodi implementa programa ne’e.
Nia husu kontribuisaun ema hotu apoiu proteje saúde orál ba labarik no indultu sira iha rai laran.
“Mai ita servisu hamutuk hodi promove hatoman aan kona-ba importánsia kose nehan ba Timor-Leste, mai ita halo eskola EBF sai ezemplu ida ba eskola seluk iha Timor-Leste, nune’e labarik hotu-hotu bele hatoman aan kose nehan”, dehan nia.
Koordenadór eskola bázika filiál Kamea, Idalina Soares, hatete antes selebra loron mundiál ne’e, parte kompañia distribui ona pastadente nehan ba estudante sira.
Alende ne’e, hanorin mós labarik sira atu kose nehan loron ida dala rua; dadeer no lokraik depois han.
Profesór disiplina saúde no ijiene hanorin mós estudante sira kona-ba maneira kose nehan iha sala aprendizajen.
Tuir aprezentasaun ekipa dentista hosi sentru saúde Bekora atu proteje nehan hosi ular tenke kose nehan dala rua, redús kuantidade hahán midar, hili hahán ne’ebé fó nutrisaun ba nehan hanesan modo tahan, ikan no ai-fuan, nune’e mós hakbesik ba sentru saúde hodi konsulta.
Nehan fahe ba kategoria rua, ida nehan labarik no nehan ba ema boot, totál nehan ba adultu hamutuk 32 no nehan labarik hamutuk 20.
Maneira kose nehan ne’ebé loloos maka kose nehan dala rua kada loron iha oras dadeer depois matabixu no kalan depois han kalan.
Jornalista: Agapito dos Santos
Editora: Rita Almeida
