DILI, 06 maiu 2019 (TATOLI) – Timor-Leste iha ona títulu formál, hafoin konklui prosesu akizisaun partisipasaun konsórsiu Projetu Greater Sunrise ho porsentu 56,56 husi ConocoPhillips no Shell. Tanba ne’e, Timor GAP, E.P hanesan entidade estadu ezekuta komersialmente iha projetu ne’e.
Reprezentante husi Ministériu Petróleu, Alfredo Pires, no ekipa Timor GAP, iha biban hasoru malu ho Primeiru-Ministru, Taur Matan Ruak, informa kona-ba projetu importante ne’ebé mak Timor GAP, E.P jere to’o ohin loron liu-liu prosesu ne’ebé mak la’o iha Greater Sunrise.
Prezidente Timor GAP, E.P, Francisco Monteiro dehan, husi parte Timor GAP, E.P, ohin “breafing” Xefe Governu katak iha parte komersiál hili ona parseiru ida atu bele implementa projetu downstream iha Greater Sunrise.
“Ami ko’alia kona-ba kontratu komersiál ne’ebé Timor Timor GAP, E.P halo ho kompañia Xineza, C.C.E.C.C (China Civil Engineering Construction Corporation Lda).
C.C.E.C.C komesa daudaun ona parseria no prosesu finansiamentu ba parte ida husi projetu downstream nian,” tenik ba jornalista sira iha Palásiu Governu, segunda (06/05).
Tuir Francisco, Greater Sunrise iha komponente boot rua hanesan dezenvolvimentu upstream ne’ebé mak presiza biliaun $5 to’o biliaun $6, iha no parte downstream presiza maizmenus biliaun $5,5 to’o biliaun $6.
“Ita-nia akordu komersiál ho C.C.E.C.C, bele dehan ita hasees ona nesesidade ida cerca de miliaun $943 to’o biliaun $1 husi projetu ne’e. Agora ita sei serbisu barak tan atu bele kobre hotu parte nesesáriu ba downstream nian,” akresenta Prezidente Timor GAP.
Iha loron 16 abríl 2019, ekipa ne’ebé lidera husi Reprezentante Espesiál Timor-Leste ba asuntu Petrolífera, Kay Rala Xanana Gusmão, konklui ona prosesu sosa partisipasaun Greater Sunrise ho montante millaun US$650, nune’e Timor GAP hanesan kompañia petrolífera nasionál iha ona partisipasaun hamutuk porsentu 56,56.
Nune’e akizisaun ho valór porsentu 56,56 ne’ebé Timor GAP simu, sei permite atu avansa diskusaun entre konsórsiu Sunrise no autoridade sira husi Austrália no mós Timor-Leste nian kona-ba Kontratu foun Fahe Produsaun Greater Sunrise.
Kampu Greater Sunrise lokaliza besik kilómetru 150 iha sudeste Timor-Leste nian no kilómetru 450 iha noroeste Darwin, iha Territóriu Norte Austrália nian.
Estadu Timor-Leste liuhosi Timor GAP halo parte ona iha parseiru hosi Konsórsiu Greater Sunrise: Woodside (operadora) ho partisipasaun hamutuk porsentu 33,44 no Osaka Gas ho porsentu 10.
Jornalista: Julia Chatarina
Editór: Rafy Belo
