Númeru Kazu Krime iha Lautém Menus

LAUTÉM, 20 maiu 2019 (TATOLI)—Komandu Polísia Nasionál Timor-Leste (PNTL) Munisípiu Lautém durante fulan janeiru-maiu 2019, ladún rejista kazu krime boot ruma mak akontese iha Lautém.
Komandante PNTL Munisípiu Lautém, Superintendente Asistente Sebastião Alves Quintão dehan, iha estatístika PNTL rejista de’it kazu 80 ne’ebé tama ba kategoria krime ki’ik hanesan problema privadu ne’ebé la perturba situasaun seguransa.
Númeru kazu krime menus, nia dehan, tanba kooperasaun serbisu polísia no autoridade lokál kontinua metin hodi garantia pás.
“Data estatístika tinan ne’e kazu krime mínimu hosi 80. Signifika, ema koopera ho PNTL kria nafatin hakmatek iha Lautém,” Sebastião ba Agência Tatoli iha Kampu 745, Lospalos Vila, Lautém, segunda ne’e.
Nia hatutan, situasaun jerál seguransa iha Lautém mós kontroladu, tanba PNTL iha membru hamutuk 167 ne’ebé fahe ba postu Lautém, Lospalos, Ilomar, Luro no Tutuala.
Kazu seluk tan ne’ebé PNTL Lautém rejista, Sebastião haktuir, maka asidente tráfegu hanesan motór monu tanba ema lanu no estrada aat, motór soke maibé la rezulta ema ruma mate.
Relasiona ho selebrasaun festa Restaurasaun Independénsia 20 Maiu ba dala 17 ne’e, Komandante PNTL Lautém ne’e agradese ba populasaun tanba kontinua hakmatek hodi kontente selebra atividade oioin ho dame.
Sebastião apela ba povu ho veteranu sira nafatin kria koordenasaun atu asegura pás no dame, tanba filozofia polísia nian katak ‘mai hosi povu no fila fali ba povu’ hodi garante seguransa no kria kooperasaun entre povu no polísia sai amigu di’ak hanesan família.
Jornalista : Eugénio Pereira
Editór: Xisto Freitas

