DILI, 4 juñu 2019 (TATOLI)—Komandu Polísia Nasionál Timor-Leste (PNTL) husu ba Estadu Timor-Leste atu tetu didi’ak polítika hodi reativa fila fali atividade organizasaun arte marsiál.
Tuir Komandante Jerál PNTL, Komisáriu Faustinho da Costa katak maski líder polítika sira promete atu reativa grupu arte marsiál, maibé tenki haree mós baze legál Lei númeru 5/2017 kona-ba rejime jurídiku prátika arte marsiál, rituál, árma branka no rama ambon atu redúz krime no konflitu entre arte marsiál.
Lei númeru 5/2017 aprova iha Parlamentu Nasionál iha loron 6/03/2017 no promulga hosi Prezidente Repúblika iha loron 12/04/2017 ho artigu hamutuk 43. Lei ne’e hanesan lei espesífiku.
“Ha’u hakarak dehan deklarasaun kompromisu polítika ne’ebé líder partidu polítiku sira halo iha tempu kompañia ne’e normál iha polítika. Maibé, keta haluha, lei númeru 5/2017 seidauk iha alterasaun. Ha’u hanoin ema boot sira ko’alia de’it, tanba ne’e polísia mantein hala’o nia kna’ar,” dehan Komjer Faustinho ba Agência Tatoli iha Kuartél Jerál PNTL, Dili, tersa (04/6/2019).
Tuir nia, Estadu tenki tetu didi’ak desizaun hotu-hotu haree ba seguransa rai laran, tanba lei ne’e seidauk halo alterasaun.
“Governu mós la’ós tuur-tuur naran atu reativa de’it, maibé sei análiza iha aspetu hotu depois mak sei aprezenta fali proposta ba lei ba Parlamentu Nasionál atu haree,” nia esplika.
Se Estadu hanoin atu reativa fila fali, Komandu PNTL husu atu líder arte marsiál hotu-hotu nia membru tenki koopera ho polísia katak tama iha organizasaun uza hanesan eventu desportiva ida, la’ós uza fali organizasaun atu halo problema ruma. Organizasaun arte marsiál sira ne’e mós tenki koopera ho líder no autoridade suku para hamutuk asegura pás atu evita problema sira ne’e mosu beibeik.
“Se ita hatudu asaun brutalizmu ka la disiplina, seráke ida ne’e governu atu reativa lalais? Ha’u hanoin la fásil,” Faustinho kestiona.
Nia hatutan, PNTL kontinua koopera ho F-FDTL atu garante seguransa ba Estadu no povu atu nia atividade ekonomia bele la’o iha pás sein problema oioin.
Antes ne’e, Sekretáriu Estadu Juventude no Desportu (SEJD), Nelio Isaac Sarmento hamutuk ho estrutura Komisaun Reguladora Arte Marsiál (KRAM) hasoru malu ho Prezidente Repúblika (PR), Francisco Guterres Lú Olo hodi esplika serbisu KRAM.
KRAM harii tuir lei nú.10/2008, loron 16 jullu, ho objetivu regulariza organizasaun arte marsiál nia hahalok ka komportamentu atu kumpri lei no kontinua mantein ba dame, estabilidade hodi garantia dezenvolvimentu nasionál ne’ebé sustentável, integradu, periódiku no ekilibradu iha aspetu hotu.
Jornalista: Eugénio Pereira
Editór: Xisto Freitas
