DILI, 11 maiu 2019 (TATOLI)—Komisaun Funsaun Públika (KFP) hahú segunda (10/06), simu keixa kazu kona-ba oknum funsionáriu públiku Autoridade Aduaneiru (AA) balun ne’ebé deskonfia involve iha kazu fasilita transasaun aimoruk droga tama-sai Timor-Leste.
KFP lamenta kna’ar funsionáriu públiku ne’ebé tuir loloos sai nu’udar ajente atu kontribui serbisu governasaun di’ak tenki monu fali ba tentasaun aat fasilita fali ema seluk lori droga tama-sai Timor-Leste.
“Horisehik (segunda), ami simu ona kazu oknum funsionáriu balun involve iha prosesu transasaun fasilita aimoruk droga no drogadu sira ne’e ba iha rai laran no rai li’ur,” dehan Komisáriu Funsaun Públika Asuntu Disiplinár, António Freitas bainhira hala’o vizita solidaridade sosiál ba prizineiru sira iha Prizaun Becora, ohin.
António informa, KPF preokupa involvimentu oknum funsionáriu iha prosesu fasilita droga mai Timor-Leste (TL) nu’udar krime sei prosesa tuir lei hodi hein mós relatóriu investigasaun ne’ebé halo hosi Autoridade Aduaneiru no Polísia Nasionál Serbisu Investigasaun Kriminál (PNSIK).
Hanesan komisáriu ba asuntu disiplinár, António sei la tolera se iha rezultadu investigasaun maka deskobre oknum funsionáriu sira ne’e involve duni iha kazu krime droga, sei fó demisaun no suspensaun.
“Ha’u sei la tolera ba funsionáriu ne’e. Ha’u apela ba kargu diretór no xefia sira katak fatin ida ne’e (komarka Becora) ba ita hotu. Se sala ruma pasiénsia fatin maka ne’e,” António alerta.
Komisáriu ne’e hatutan, agora dadaun VIII Governu halo hela esforsu maka’as hodi reforma iha administrasaun públika, tanba ne’e diretór no funsionáriu sira serbisu tenki hatudu disiplina hodi hetan governasaun di’ak.
António apela ba kargu diretór no xefia sira halo serbisu ho loloos. Labele halo serbisu ruma tenki hein envelope ruma tama maka foin serbisu la’o.
“Kargu diretór sira labele tergoda, labele bermain api, labele bermain suratahan. Keta halo ikus liu tutela ba imi-nia kompeténsia administrativu asina Commitment and Paimend (CPV) ne’e dalaruma diabu mós tama ka dalaruma Maromak mós bele sees. Situasaun sira ne’e hotu ita tenki kuidadu ka hakribi tiha buat aat sira ne’e,” nia subliña.
Nia dehan, KFP koordena hela liña ministeriál inklui autoridade seguransa PNSIK, F-FDTL no Afándega hodi halo hela prosesu investigasaun kle’an ba oknum funsionáriu sira ne’e.
“Ami investiga hela oknum funsionáriu sira ne’e. Seidauk terminadu. Investigasaun hotu mak ita sei haree,” nia haklaken.
Kona-ba totál funsionáriu ne’ebé involve iha prosesu fasilita aimoruk droga tama-sai, Komisáriu António rejeita esplika tanba sei hein prosesu investigasaun.
“Ha’u labele dehan uluk númeru hira tanba prosesu tomak iha ha’u nia fatin sei la’o hela,” nia salienta.
Nia hatutan, tuir lei Funsaun Públika, oknum funsionáriu involve iha kazu droga nu’udar krime grave ida, tan ne’e sei fó suspensaun no demisaun no kazu krime sei prosesa ba Ministériu Públiku (MP) no hafoin ne’e MP sei aprezenta ba Tribunál atu julga tuir lei.
Jornalista: Eugénio Pereira
Editór: Xisto Freitas
