DILI, 15 juñu 2019 (TATOLI) – Reprezentante Prezidente Komisaun Organizadora ba Inaugurasaun Aeroportu Internasionál Oe-Cusse “Rota do Sândalo”, Inaçia da Costa Teixeira, informa, iha loron 18 fulan ne’e, sei inaugura Aeroportu Internasionál Oe-Cusse.
“Preparasaun di’ak ona, ami monta ona ekipa responsavel iha área idak-idak nian, hanesan ekipa divertimentu nian, monta palku, nune’e iha 18 juñu maka foin serimónia íntimu,”Inaçia Teixeira, ba Ajénsia TATOLI, iha Aeroportu Oe-Cusse, Sábadu (15/6/2019).
Molok inaugura Aeroportu ida ne’e, informa Inaçia Texeira, komisaun organizadór sira hala’o ona programa sira hanesan loke espozisaun, bazar kalan ne’ebé hahú iha 14 juñu ho objetivu atu selebra tinan Rejiaun Administrativu Espesiál Oe-Cusse Ambeno (RAEOA) ba da-lima iha Oe-Cusse.
Tuir ajenda ne’ebé iha, 16 juñu, grupu juventude sira sei realiza programa kompetisaun pintura iha área Sakato. Loron tuir mai, 17 juñu kalan, sei realiza programa kalan kulturál no mós dansa modernu iha Woebau. Nune’e iha 18 juñu, tama ona serimónia inaugurasaun aeroportu, ne’ebé sei hetan prezensa hosi Prezidente Repúblika, Prezidente Parlamentu Nasionál, Prezidente Tribunál Rekursu, Reprezentante Primeiru Ministru, membru governu sira, inklui marka prezensa mós bainaka sira hosi Jakarta ho Timor Osidentál (NTT-sigla indonézia)
Hahú loron 17, 18 no 19 juñu hanesan kalan espetakulár, maibé iha 18 kalan, artista sira hosi Indonézia sei diverte maka hanesan Maha Dewi, Mario Klau, Mita Talawatu inklui artista timoroan sira hanesan Gerson, Maria Vitória, Sidália, Alda no seluk tan.
Jornalista : Zezito Silva
Editór : Francisco Simões
