DILI, 17 juñu (TATOLI)– Komandante Jerál Polísia Nasional Timor-Leste (PNTL), Komisáriu Polísia, Faustino da Costa, dezafia Komandante Munisípiu Dili, Superintendente Xefe, Armando Monteiro ho Segundu Komandante Polisia, Superintendente Asistente Polisia, Euclides Belo, atu halo esforsu maka’as lori Dili sai hosi konflitu ba dame.
Komandante Faustino dehan, ikus-ikus ne’e sidade Dili kontinua mosu konflitu ne’ebé fó ameasa ba estabilidade seguransa iha rai laran.
“Ita nia tenke halo povu moris hakmatek la’ós de’it iha Dili, maibé mós munisípiu hotu too suku no aldeia, ida ne’e nu’udar knaar polisia sira,” afirma Komisáriu Faustino da Costa, ohin, iha ámbitu serimónia pose ba komandante Polisia na’in lima iha Kuartél Jerál PNTL, Caicoli Dili.
Komandante Faustino fó parabéns ba Segundu Komandante Polisia Superintendente Asistente Polisia, Euclides Belo, ne’ebé durante ne’e asume knaar komandante interinu hasoru dezafiu, maibé konsege halo esforsu maka’as prevene krime oin-oin atu lori Dili ba ba moris hakmatek.
Ho prezensa Komandante Armando, Komisáriu Faustino da Costa espera, bele halo servisu másimu liután hodi koordena ho Komandu PNTL unidade sira seluk, implementa daudauk ona operasaun “Aplika Lei, Dili Hakmatek” hodi asegura seguransa oras 24 ba povu kapitál Dili too munisípiu hotu- hotu.
Fatin hanesan, Komandante, Armando Monteiro hato’o agradese ho konfiansa Komandu PNTL hodi lidera Dili nu’udar ninia area jurisdisaun.
“Agradese ho konfiansa, ita sei hamutuk para implementa servisu hotu tuir orden komandu nian,” afirma Armando Monteiro.
Komandante Komandu Operasionál Nasionál (KKON), Superintendente Xefe Pedro Belo, afirma nia apoiu servisu Komandu Dili atu lori Dili moris hakmatek.
Nia dehan, Dili tenke livre hosi konflitu hotu- hotu, atu nune’e, bele fó valór pozitivu ba komunidade no setór privadu hala’o atividade ekonomia no servisu hotu di’ak liután.
“Se ema malandru sei barak, operasaun sei aumenta forsa no kontinua halo operasaun too Dili moris hamatek,” afirma Pedro Belo.
Biban ne’e, Segundu Komandante Polisia Munisípiu Dili, Euclides Belo dehan, PNTL Munisípiu Dili koloka ona membru hamutuk na’in 480 liu hodi hala’o seguransa iha Dili laran.
Polisia 480 ne’e asegura seguransa iha Postu Administrativu neen hanesan, Atauro ho suku lima (5), Cristo Rei ho suku hitu (7), Don Aleixo ho suku lima (5) Metinaro ho suku rua (2), Nain Feto ho suku neen (6) no Vera Cruz ho suku hitu (7).
Polisia sira ne’e mai hosi unidade, Ofisial Polisia Suku (OPS) ne’ebé hetan apoiu hosi Unidade Polisia Espesiál no polisia eskuadra Dili hodi servisu ho autoridade suku sira garantia seguransa hosi loron too kalan.
Jornalista : Eugénio Pereira
Editór : Francisco Simões
