OE-CUSSE, 18 juñu 2019 (TATOLI) – Ministru Reforma Lejizlativa no asuntu Parlamentár, Fidelis Manuel Leite Magalhães, hateten, VIII Governu Konstitusionál lakohi atu espekula mandatu Prezidente Autoridade Rejiaun Administrativa Espesiál Oe-Cusse Ambeno (RAEOA), Mari Alkatiri, tanba prosesu la’o hela.
“AMP hanesan aliansa polítika ida hodi hola nia pozisaun, maske governu ne’e forma hosi aliansa maibé atu deside mandatu, ida ne’e kompeténsia governu nian,” hateten Ministru Fidelis Leite Magalhães ba jornalista sira, ohin, hafoin partisipa serimónia inaugurasaun Aeroportu Internasionál Oe-Cusse “Rota do Sândalo”.
Fidelis subliña tan, maske Aliansa Mudansa ba Progresu (AMP) hola ona desizaun liuhosi rezolusaun, maibé governu sei foti medida bainhira tempu to’o ona.
Nia mensiona mós katak, governu sei la halo figura sombra hodi troka Mari Alkatiri tanba dezenvolvimentu importante tebes ba Timor-Leste, liuliu iha RAEOA.
Iha fatin hanesan, Prezidente Parlamentu Nasionál, Arão Noe de Jesus Amaral, afirma katak, timoroan hotu iha direitu hanesan ba mandatu tinan lima oin mai, maibé importante maka tenke kontinua halo dezenvolvimentu iha rejiaun ne’e.
Jornalista : Zezito Silva
Editór : Francisco Simões
