DILI, 18 juñu 2019 (TATOLI)—Hafoin susesu lidera ekipa Timor-Leste iha espozisaun mundiál iha Milano, Itália, iha tinan 2015, sai hanesan sasukat importante ba Konsellu Ministru (KM) hodi nomea tan eis Ministru Turizmu, Arte no Kultura (MTAK), Francisco Kalbuadi Lay, nu’udar autoridade nasionál ba espozisaun Dubai 2020.
Governu liuhosi reuniaun Konsellu Ministru (KM), Kuarta (12/6/2019), aprova despaixu hosi Primeiru-Ministru (PM), Taur Matan Ruak, nomea Francisco Kalbuadi Lay, atuál Sekretáriu Jerál Partidu partidu CNRT nu’udar autoridade nasionál ba Espozisaun 2020 iha Dubai, Emiradu Árabe Unidu. Espozisaun mundiál ne’e sei hala’o hosi loron 20 outubru 2020 to’o loron 10 abríl 2021.
“Agradese ba Primeiru-Ministru no Konsellu Ministru, ne’ebé fó fiar mai ha’u ho serbisu todan ida ne’e. Ha’u tenta lidera ekipa ne’e ho di’ak no ho susesu,” hateten Koordenadór Jerál Aliansa Mudansa Ba Progresu (AMP), Francisco Kalbuadi Lay, ohin, hodi responde jornalista sira iha sede nasionál partidu CNRT, Dili.
Susesu espozisaun internasionál iha tinan 2015 iha Milano-Italia, konsege lori kafé orgániku Timor nian iha primeiru lugár no úniku kafé ne’ebé mak determinadu iha hodi konsumu iha área espozisaun nia laran.
Dezde kedas loron 24 maiu 2015, úniku kafé orgániku Timor nian mak uza iha Expo Milano nia laran no stand hotu-hotu iha Expo ne’e sei konsumu de’it kafé Timor.
Espozisaun internasionál iha Milano momentu ne’ebá hetan bensaun hosi Sua Santidade Papa Francisco Bergoglio, ho mensajen dame ba mundu.
Entre nasaun 10 ne’ebé mak tuir iha closer kafé iha Expo Milano ne’e, úniku kafé Timor mak hanesan klasifikasaun kafé ne’ebé mak gostu tebes hodi hetan gratifikasaun bele konsumu iha stand hotu-hotu iha área Expo nia laran. Nune’e, espozisaun Milano ne’ebé hahú iha loron 1 maiu to’o loron 30 outubru 2015, kafé Timor mak sai komoditi ne’ebé bele konsumu iha stand internasionál hotu-hotu.
Durante ámbitu espozisaun Milano nian mak bainhira bainaka internasionál sira, inklui korpu diplomátiku sira ne’ebé mak vizita ba fatin espozisaun Timor sempre simu prenda tais ho kafé.
Jornalista: Francisco Simões
Editór: Xisto Freitas
