DILI, 04 jullu 2019 (TATOLI)- Komisaun Nasionál ba Eleisaun (CNE-sigla portugés), kuarta (03/07/2019), realiza plenária ordinária hodi diskute ajenda prioridade lima.
Ajenda diskusaun ne’e, kompostu husi preparasaun nomeiasaun Vise Presidente CNE, aprezentasaun no apresiasaun regulamentu arekadasaun ba Partidu Polítiku, aprezentasaun matéria formasaun ba Partidu Polítiku, aprezentasaun matéria Memorandum Of Understanding (MoU) CNE ho Sentru Formasaun Jogjakarta no ajenda ikus kona-ba apresiasaun ba preparasaun reuniaun ho Asia Democracy Network (ADN).
Komunikadu CNE nian ne’ebé TATOLI asesu, ohin, relata katak, reuniaun ne’e prezide husi Prezidente CNE, Alcino de Araújo Barris no partisipa husi komisáriu CNE nian.
Iha tempu besik CNE sei realiza votasaun hodi hili Vise Prezidente CNE foun ne’ebé antes ne’e sei vakum, hafoin de Vice Prezidente sesante, Duarte Tilman asume hikas kargu seluk iha Tribunál de Rekursu.
Tuir desizaun plenária katak iha loron 17 jullu ne’e, sei realiza votasaun hodi eleje Vise Prezidente CNE foun, haktuir ba kompeténsia ne’ebé atribui mai CNE, Lei nú 7/2016 art. 5 kona-ba kompozisaun alínea 4,
Ajenda seluk kona-ba akordu ne’ebé CNE sei halo ho Sentru Formasaun Jogyakarta, oinsá bele asina Nota de Entendimentu hosi parte rua nune’e bele haruka pesoál IT CNE nian atu tuir formasaun iha Sentru Formasaun refere.
Iha tempu besik CNE mós sei asina Nota de Entendimentu ho Asia Democracy Network (ADN), ho objetivu atu haburas liu demokrasia iha Kontinente Ázia, tanba ADN nu’udar sombriña ba sosiedade sivíl iha Ázia ne’ebé serbisu ba Dezenvolvimentu Demokrasia.
Iha nivel Nasional CNE mós sei asina akordu ida ho universidade, hanesan Universidade Nasionál Timor Lorosa’e (UNTL) ho Universidade Dili (UNDIL) inklui Sosiedade Sivíl, nu’udar meius ida atu haburas demokrasia iha Timor Leste nune’e iha futuru mai bele reforsa mehi CNE nian atu Instala Sentru Formasaun Dezenvolvimentu Demokrasia iha CNE.
Plenária ne’e mós diskute kona-ba formasaun ba pesoál finansas no tezouraria partidu polítiku sira oinsá bele halo relatóriu ba prosesu gastu Orsamentu Subvensaun Públika ne’ebé atribui ba PARPOL asentu Parlamentár através de Konta Bankária CNE nian.
Jornalista : Eugénio Pereira
Editór : Francisco Simões
