DILI, 08 jullu 2019 (TATOLI)-Governu Timor-Leste ho Governu Tailándia, kontinua hametin kooperasaun iha setór edukasaun.
Kometimentu ne’e hato’o husi Sekretáriu Permanente Ministériu Edukasaun Tailándia, Duriya Amatavivat durante simu vizita serbisu Vise Ministru Edukasaun Juventude no Desportu, João Zacarias Freitas Soares, iha Tailándia iha loron, 7 Juñu 2019.
Komunikadu imprensa husi Ministériu Edukasaun Juventude no Desportu (MEJD) ne’ebé Ajénsia Tatoli asesu, ohin, haktuir katak, Vise Ministru, João Zacarias hala’o vizita kortezia ba Tailándia hodi responde ba konvite espesiál husi Ministériu da Edukasaun Tailándia partisipa iha serimónia Scout Jamboree Ceremony iha Chonburi- Tailándia.
João Zacarias konsidera vizita ne’e oportunidade hodi hatudu sinál katak relasaun bilaterál entre rai rua la’o di’ak no metin ba beibeik liu-liu iha área edukasaun.
Biban ne’e mós Vise Ministru no Sekretáriu Permanente konkorda atu aselera lalais Memorandu Entendimentu no husu Ministériu Edukasaun Juventude no Desportu Timor-Leste atu kontinua esplora área nesesidade no prioridade sira tanba Ministériu Edukasaun Tailándia prontu atu apoiu nafatin liu-liu iha área tékniku vokasionál.
Akompaña Vise Ministru João Zacarias ho delegasaun iha enkontru mak Embaixadór RDTL ba Reinu Tailándia, Joaquim Amaral no ofisial embaixada.
Hafoin ne’e, delegasaun TL hala’o mós enkontru informál ho Embaixadór Joaquim Amaral hodi fahe informasaun no atualiza serbisu edukasaun nian.
Jornalista : Eugénio Pereira
Editór : Francisco Simões
