DILI, 16 jullu 2019 (TATOLI)–Negosiadór Prinsipál ba Delimitasaun Fronteira Marítima, Kay Rala Xanana Gusmão hateten aprovasaun pakote lei haat hosi Parlamentu Nasionál (PN) importante tanba bainhira ratifika tratadu foun mak sei hamosu rejime foun.
“Aprovasaun ba pakote lei haat ne’e importante tebes, tanba ita sei hetan benefísiu barak hosi ratifikasaun ba tratadu foun no sei hamosu mós rejime foun iha Tasi Timor. Benefísiu ba ita mak Kampu Bayu-Undan ne’ebé ita sei la fahe tan royalty pursentu 10 (10%) ho Austrália,” intervensaun Xanana bainhira halo audisaun konjunta entre Komisaun B, C no D ho Governu no Xefe Negosiadór ho ninia ekipa, iha plenária Parlamentu Nasionál, tersa ne’e.
Tanba ne’e, Negosiadór Prinsipál husu membru PN sira hodi bele halo aprovasaun ba alterasaun pakote lei haat ne’ebé sei debate ho karáter urjénsia.
“Ita aprova tiha lai ba nune’e progresu la’o ba oin, tanba ne’e ita-nia soberania ligadu ba ita-nia tasi Timor,” katak Xanana.
Tuir nia, alterasaun lei haat importante mós ba Timor-Leste atu aselera ratifikasaun Tratadu Fronteira Marítima iha 30 agustu 2019.
Nia akresenta liu-tan, alterasaun ba lei haat ne’e atu kompleta ba rejime foun ne’ebé sei mosu mai hafoin tratadu ne’e tama iha vigór.
“Bainhira ita halo ona ratifikasaun, Primeiru-Ministru Timor-Leste ho Primeiru-Ministru Austrália mak sei troka nota entendimentu iha 30 agustu iha Timor-Leste,” nia hateten.
Prezensa Negosiadór Prinsipál iha audiénsia atu esplika ba deputadu sira kona-ba alterasaun no armonizasaun Pakote Lei Petrolífera hanesan Lei Tributária, Lei Laborál no ratifikasaun Tratadu Fronteira Marítima entre Timor-Leste ho Austrália ne’ebé tuir kalendáriu sei realiza iha loron 30 agustu 2019.
Iha audisaun konjunta ne’e akompaña hosi reprezentante Governu hanesan Ministru Estadu Prezidénsia Konsellu Ministru, Agio Pereira, Sekretáriu Estadu Komunikasaun Sosiál, Merício Akara, Prezidente Aautoridade Naionál Petróliu no Minerál (ANPM), Gualdinho da Silva, Prezidente Timor GAP,ep, Francisco Monteiro no Diretora Ezekutiva Fronteira Marítima, Elisabeth Exposto.
Jornalista: Evaristo Soares Martins
Editór: Xisto Freitas
Notísia Relevante:
PN Aprova Pedidu Debate Karáter Urjénsia Ba Proposta Lei Haat
