DILI, 17 Jullu 2019 (TATOLI)—Klube Assalam FC halakon armada Cacusan FC ho golu 10-1 iha jogu Tasa 12 Novembru ne’ebé hala’o iha Estádiu Munisipál Dili, ohin lorokaik.
Hosi vitória ne’ebé Assalam gaña lori kedas ekipa ne’e hakat liu ba faze kuartu finál hodi hein ekipa seluk iha jogu segundu. Enkuantu, Cacusan FC obrigadu tenke sai hosi tasa refere basá jogu ne’e uza sistema lakon-sai (bota fora/sistem gugur– termu Indonézia).
Golu vitória Assalam hatama hosi Filipe da Cruz (17) iha minutu 8, 24, Franciatma Kefin (21) iha minutu 40, Osorio Gusmão (15) iha minutu 42, Daniel Adadi (10) iha minutu 57, 86, Edit Xavio (9) iha minutu 73, 77, Buaten (8) iha minutu 84, Martinho Belo (16) iha minutu 89. Iha parte seluk, golu úniku hosi Cacusan prodúz hosi Gerónimo Freitas (17) iha minutu 80.
Hafoin jogu ramata, ba Agência Tatoli, treinadór Assalam, Andi Susanto, hateten nia sente kontente bainhira nia ekipa manán Cacusan ho golu ne’ebé boot. Nia dehan, sira la hanoin atu manán ho rezultadu ne’ebé sira-nia mehi la to’o.
“Ha’u la imajina ami bele manán hanesan ne’e. Obrigadu ba Maromak tanba ami bele manán. Ba oin, ha’u tenke serbisu nafatin atu ami-nia ekipa bele hakat ba oin iha jogu tuir mai,” tenik Andi.
Jornalista: Hortençio Sanchez
Editór: Xisto Freitas
