DILI, 17 jullu 2019 (TATOLI)—Prezidente Autoridade Nasionál Petróliu no Minerál (ANPM), Gualdinho da Silva, hateten maski Austrália esplora ona posu Buffalo iha tinan barak, maibé peskiza foun hosi kompaña hatudu katak sei iha millaun 31.1 barril.
“Iha tinan kotuk sira tau iha sira-nia relatóriu katak sira deskobre ona iha millaun 31.1 barril ne’ebé mak bele prodúz, tanba ne’e ita bele dehan rezerva estimadu ne’ebé aprovadu iha fulan kotuk sira prepara tiha ona sira-nia planu jestaun ambientál atu halo perfurasaun. Sira hakarak halo perfurasaun, maibé sira hakarak hafoin ratifikasaun Tratadu Fronteira Marítima. Sira hakarak halo perfurasaun iha rejime foun Timor-Leste nian duké iha Austrália,” dehan Gualdinho durante audisaun konjunta komisaun tolu ho Governu, iha Parlamentu Nasionál (PN), kuarta ne’e.
Nia esplika, kompañia ne’ebé halo peskiza asesmentu ba posu ka mina-matan tuan ne’e sei halo perfurasaun hafoin ratifikasaun ba Tratadu Fronteira Marítima.
Gualdinho informa tan, antes ne’e prodúz ona mina iha posu Buffalo no Austrália fó fali lisensa ba kompañia foun ida mak halo programa peskiza asesmentu ba kampu ne’ebé prodúz tiha ona, maibé kompañia ne’e hakarak halo perfurasaun iha área jurisdisaun Timor-Leste nian, la’ós iha Austrália nian.
Nia dehan tan, parte autoridade Austrália aprova tiha ona planu ambientál ba kompañia refere no Timor-Leste mós konfirma katak sei valida perfurasaun ne’e, tanba rejime Timor-Leste ho Austrália la dook malu.
“Sira husu fulan neen hafoin tratadu ratifika, tanba ne’e mak sira tenke halo preparativu no kálkulu ba kustu ruma, tamba ne’e sira husu ita nia konfirmasaun,” esplika Prezidente ANPM.
Gualdinho ko’alia asuntu posu Buffalo hodi hatán ba pergunta Deputadu Bankada PD, Adriano do Nascimento, ne’ebé preokupa ho posu Buffalo ne’ebé Austrália esplora hotu ona maibé iha diskusaun sei ko’alia bebeik ba asuntu mina-matan ne’e.
Jornalista: Evaristo Soares Martins
Editór: Xisto Freitas
