DILI, 17 jullu 2019 (TATOLI)–Ministru Justisa, Manuel Cárceres da Costa, informa hahú tinan ida ne’e ba oin, Serbisu Notariadu ne’e sei la konsentra de’it iha Dili maibé ida-idak ba halo iha ninia munisípiu, tanba ne’e agora parte ministériu komesa ona loke konkursu ba ekipamentu.
“Tinan ida ne’e, ami atu halo akizisaun ekipamentu no agora iha ona prosesu nia laran—atu sosa komputadór foun hodi haruka ba munisípiu sira para sira bele halo iha kada munisípiu,” nia tenik iha Palásiu Governu, kuarta ne’e.
Nune’e mós, nia dehan, kona-ba kontratu arrendamentu ne’ebé ki’ik la presiza ministru mak asina.
“Sira valór ki’ik ne’e Diretór Munisipál Terra no Propriedade mak asina de’it iha sira-nia fatin para bele evita kontratu ida iha Lospalos tenke lori mai Dili mak ministru asina,” Cárceres akresenta.
“Ha’u halo delegasaun kompeténsia ba Diretór Munisipál sira para bele asina de’it kontratu sira hanesan ne’e,” nia hatutan.
Governante ne’e haklaken, kona-ba pasaporte nafatin tenke asina iha Dili maibé tratamentu iha ona ida-idak nia munisípiu.
Jornalista: Julia Chatarina
Editór: Xisto Freitas
