DILI, 29 jullu 2019 (TATOLI) – Governu liuhosi Ministériu Justisa (MJ) deside loke tan Diresaun Jerál rua foun, Diresaun Nasionál haat no Diresaun Inspesaun Apoiu Ministériu Justisa ida.
Antes nee Ministeriu Justisa iha deit diresaun jerál ida no ohin loke tan rua hodi kompleta diresaun jerál tolu iha organigrama ministeriu nian.
Bazeia dekretu lei númeru 32, 31/2019/Prezidente Komisaun Funsaun Públika, maka Ministru Justisa tenke nomeia tan kargu xefia ida-ida tuir diresaun ne’ebé kolokadu kompostu hosi Diretór Jerál tolu, Diresaun Jerál Administrasaun Polítika Justisa, Diresaun Jerál Teras Propriedade no Diresaun Jerál Servisu Rejistu Notariadu.
Alien de area diresaun Nasionál tolu inklui mós inspetór apoiu gabinete auditoria ba kargu xefe unidade aprovizionamentu MJ na’in ida.
Ministru Justisa, Manuel Cárceres, hatete, ho konfiansa ne’ebé iha, konforme dekretu lei númeru 32, 31/2019/Prezidente Komisaun Funsaun Públika, Ministériu Justisa nomeia kedas kargu xefia tuir ida-ida nia area ne’ebé tenke halo servisu tuir lei orgániku Ministériu Justisa nian.
“Ha’u iha konfiansa boot ba funsionáriu sira ne’ebé nomeia ba kargu xefia iha diresaun sira, tanba ita loke tan ona diresaun jerál rua, nasionál haat no inspetór ida, no ema sira ne’e, ita sei lori ba aprezenta ba Prezidente Konsellu Funsaun Públiku,” informa Ministru Manuel Cárceres ba Ajénsia TATOLI, ohin, iha Salaun Ministériu Justisa, Caicoli.
Ministru hatete, ba diretores jerais, nasionais no xefe inspetór ne’ebé nomeia sei hahú halo servisu iha loron 1 fulan Agostu ne’e. Tanba Ministériu Justisa sei aprezenta diretores foun sira ne’e ba prezidente konsellu funsaun públiku.
Ministru Manuel Cárceres apela ba kargu xefia foun sira, atu oinsá halo servisu ne’ebé mak di’ak, hadi’a no administra didi’ak servisu, no tenke tuir padraun lei orgánika Ministériu Justisa nian.
“Ha’u iha konfiansa boot ba sira na’in hira ne’ebé ha’u nomeia, maibé hakarak husu dala ida tan, tenke hatudu duni ita nia vontade servisu ho di’ak, administra ho di’ak tuir Ministériu Justisa nia dekretu lei ne’ebé iha ona,” Ministru Manuel Cárceres tenik.
Jornalista : Domingos Piedade Freitas
Editór : Francisco Simões
