DILI 30 jullu 2019 (TATOLI) – Durante nee, Timor-Leste adopta hela lei United Nations Transitional Administration in East Timor (UNTAET), tanba ne’e, jurista timoroan Sergio Quintas, konkorda ho polítika reforma lejizlativu atu bele lori mudansa no muda lei balun iha UNTAET nian ne’ebé la kondís ona ho situasaun Timor-Leste nian.
Sergio Quintas hateten, agora governu iha ona planu atu reforma lejizlasaun inklui servisu tribunais nian espera katak sei muda situasaun hotu ho di’ak.
“Ita espera katak situasaun ne’e bele muda, tanba tuir ha’u rona katak governu iha ona planu atu halo reforma ba lejizlasaun sira ne’ebé tuan ona. Satán leis sira ne’ebé halo kedas iha UNTAET nia tempu. Entaun ita iha esperansa boot ita sei bele muda buat hotu ho di’ak, tanba ita hatene katak ema hotu-hotu lao iha lei nia oin hanesan de’it,” tenik Sergio Quintas, ohin, iha Tribunal Distrital Dili.
Jurista Avelino Coelho mós hateten, lei iha tiha ona liuhosi primeiru Governu, atu reforma lejizlativa depende ba polítika Governu ida idak ne’ebé mak kaer ukun, se lei ida mak korresponde ninia polítika mantein, hakarak halo lei ida ne’ebé mak aserta ka reajusta halo di’ak liu, bele halo reforma lei sira bele avansadu liu no ladún responde ba sosiedade ninia dezenvolvimentu, entaun kualkér Governu iha direitu no kompeténsia halo polítika no reforma lejizlativa.
“Ha’u hanoin lei ida atu apár ho kondisaun no situasaun ho TL depende ba Governu ida nia haree no polítika ba tinan lima nian,” hateten Avelino Coelho.
Nia husu tenke haree katak lei sira nee relevante ka la relevante, hakarak muda artigu ida ne’ebé depende maibé tenke haree mós situasaun no kondisaun iha uma laran.
Hatán ba kestaun nee, Ministru Justisa, Manuel Cárceres hateten, ezbosu lei Komisaun órgaun jurisdisaun artigu barak, atus ida resin atu regula justisa ninia lala’ok tenke hanesan nee.
Nia afirma katak, lei nee atu regula de’it UNTAET no altera/hasai tiha UNTAET hodi tau fali Timor nian.
Jornalista : Domingos Piedade Freitas
Editór : Francisco Simões
