DILI, 31 jullu 2019 (TATOLI) – Juiz Administradór Tribunal Distritál Dili (TDD), José Maria de Araújo, informa, kinta aban (01/07/2019), tribunais sei hahú ferias judisiáriu too iha loron 15 de setembru 2019.
“Ha’u hanoin hot-hotu hatene katak kada tinan iha ferias judisiáriu, hahú hosi agostu too loron 15 setembru 2019, no sei funsiona fali servisu iha loron 16 setembru iha tinan ida nee,” informa Juiz Administradór Tribunal Distritál Dili (TDD), José Maria de Araújo, ba ajénsia TATOLI, iha nia servisu fatin iha TDD.
Nia hatutan, durante ferias judisiáriu atividade Tribunal suspende hotu kedan, so iha de’it kazu urjente ruma, iha oras 72 nia laran, ezemplu iha primeiru interrogatóriu, sumáriu no providénsia kautela.
Juiz nee mós esplika tan katak durante ferias judisiáriu tuir mapeamentu iha TDD iha juizés 13, maibé antes iha ona diretiva ida katak juis Eusebio no Sribuana, durante ferias judisiais ba iha Tribunal Oe-Cusse no hela de’it ona juizés 11 iha TDD.
Iha biban nee mós, juizés na’in tolu mós ba formasaun iha Portugal tanba antes nee, sira iha ona kursu intensivu iha sentru formasaun Caicoli. Ho nune’e, juis ne’ebé mak tama iha tornu ida nee, iha ferias judisiais nee mós ba tuir formasaun iha Portugal inklui mós ho juis ida hosi Baucau no seluk ida hosi Suai.
Jornalista : Domingos Piedade Freitas
Editór : Francisco Simões
