DILI, 01 agostu 2019 (TATOLI)-Diretór Jerál Asuntu Konsulár Protokolár, Serimoniál no Mídia, hanesan mós Vise Koordenadór Jeral Protokolu, Juvêncio de Jesus Martins, hateten katak enkontru preparativu komemorasaun Konsulta Populár, 30 Agostu, fó sai ona bainaka konvidadu sira maske nune´e bazea ba konfirmasaun.
“Ami fó hatene deadline to’o dia 31, mas to´o ohin, balun foin mak konfirma. Ne´ebé mak konfirmadu ona ne´e mak hanesan Portugal, Cook Island (país autonomu oseanu pasífiku), Kambodia, Singapura, Nova Zelándia ho UNAMET (United Nations Transitional Administration in East Timor) Ian Martin (Eis); ne’e konfirma ona,” informa Diretór Jerál Asuntu Konsulár Protokolár, Seremoniál no Mídia, Juvêncio de Jesus Martins, ba Ajénsia TATOLI iha edifísiu Ministériu Finansas Ai-tarak Laran, kinta (01/08/2019).
Tanba ne´e, tuir nia, ekipa preparativu booking ona fatin no prepara lojístika ba sira, depende ba konfirmasaun. “Ikus balun konfirma tan mai, ikus liu to’o dia 5 ne´e ba de´it g7+. Se to´o dia 5 agora sira konfirma, prontu, ita ita halo tan rezimentu ba sira, logistical protocol ba sira”.
Nia mós hateten katak ekipa preparativu husu ona mós ba konvidadu sira atu haruka delegasaun mai prepara: “Purezemplu Portugal mai ho ema na’in hira, depois tau iha sira-nia akomodasaun balun, bele mós haree akomodasaun ba sira-nia akompañante, hanesan mós ba sira seluk”.
Vise Koordenadór Jerál Protokolu, Juvêncio de Jesus Martins informa liutan katak lista konfirmasaun hosi ita-nia Prezidente Repúblika mak foin Prezidente Asembleia Portugal de´it no balun seidauk konfirmasaun. Enkuantu, husi Primeiru Ministru nian, ne´ebé mak konfirma ona mak hanesan Cook island, Kambodia, Singapura, Nova Zelándia; konfirma ofisialmente.
“Ami hato’o desizaun katak deside dia 31 ami ko’alia kedas ho sira, to’o agora iha de’it konfirmasaun verbál hosi parte balun, ezemplu hosi Filipina dehan katak prezidente sei haruka nia reprezentante mai, maibé nia la mai,” nia haktuir.
Enkuantu, iha biban hanesan, Diretora Asuntu Sosiokultura-ASEAN hanesan mós Koordenadora Sesaun Protokolu no Serimoniál, Madalena Viegas Filipe iha nia aprezentasaun perante Komisaun Organizadora sira kona-ba lista bainaka estranjeiru sira hosi país ne’ebé sei mai partisipa iha komemorasaun tinan 20 loron Konsulta Populár; lista konfirmasaun eskritu totál na´in 6.
“Hosi Portugal, Prezidente Asembleia Repúblika, Cook Island Primeiru Ministru, Kambodia Vise Primeiru Ministru ho nia Espoza ho nia delegasaun na´in 7, Singapura Ministriu Estadu ho delegasaun na’in 3, Nova Zelándia, Ministru Transporte no Ekonomia Dezenvolvimentu ho nia delegasaun na´in 2, Ian Martin ho nia membru delegasaun na’in 5”.
“Hosi lista konfirmasaun verbál hosi ita-nia prezidente konfirma na’in 5 no hosi ita-nia primeiru ministru iha konfirmasaun verbál na’in 3,” relata Koordenadora Sesaun Protokolu no Serimoniál, Madalena Viegas Filipe iha nia aprezentasaun.
Entretantu, hosi parte protokolu ba Loron Konsulta Populár hein hela faze finál ba konfirmasaun hosi bainaka sira.
Notísia relevante: http://www.tatoli.tl/2019/08/01/ohin-loron-ikus-enkontru-preparativu-atividade-konsulta-popular/
Jornalista : Nelia Fernandes
Editór : Rafy Belo