DILI, 01 agostu 2019 (TATOLI) – Tribunal Distritál Dili (TDD), ohin, tuku 9:00 dadeer, halo inspesaun lokál ba kazu Kulu-hun ne’ebé deskonfia envolve hosi oknum Polisia Nasionál Timor-Leste (PNTL) na’in rua ho inisiál JAP ho FMS.
Notísia Relevante : Vítima Trajédia Kulu-hun Fó Deklarasaun Ba Tribunál
Trajédia negra ne’ebé akontese iha tinan kotuk ne’e rezulta joven na’in tolu mate no hakanek ema na’in lima seluk.
Razaun halo inspesaun lokál iha akontesimentu Kulu-hun de Baixu tanba iha julgamentu kuarta (31/07/2019), parte tribunal, defensór ho Ministériu Públiku ladún apár didi’ak ho deklarasaun sasin nian.
“Ha’u rasik defeza hosi arguido inisiál FMS mak husu pedidu ba tribunal atu halo inspesaun lokál hodi apár ho deklarasaun sasin nian,” dehan Defensor Públiku Estaquio Guterres ba jornalista iha fatin inspesaun lokál, Kulu-hun de Baixu, Dili.
Estaquio esplika katak, objetivu inspesaun nee atu hatene kle’an kona ba situasaun distánsia entre arguido, vítima no mós sasin sira nia hamriik fatin iha tenda laran, hodi bele sai sasukat loloos ba defeza no prokuradór, liuliu ba Tribunal hodi foti desizaun loloos no justu.
Estaquio intende katak, vítima sira nee mate tanba hetan tiru hosi sira na’in rua ida, maibé iha deklarasaun arguido sira nian, nega hotu faktu sira katak, arguido JAP dehan arguido FMS mak tiru no FMS dehan fali JAP mak tiru, maibé konforme fila fali ba tribunal nia desizaun.
Kona ba ezame balístiku parte polisia bele identifika bala musan sira hosi arguido ida-idak nian, Estaquio hateten, rezultadu ezame mak indika ba arguido na’in rua ou lae.
“Se rezultadu ezame balístiku mak hatudu katak bala musan arguido na’in rua nian, sira tenke responsabilidade ba sira hahalok nee,” tenik Estaquio Guterres.
Jornalista : Domingos Piedade Freitas
Editór : Francisco Simões
