DILI, 3 agostu 2019 (TATOLI) – Prezidente Repúblika (PR), Francisco Guterres Lú Olo, hateten razaun nia estende mandatu Majór Jenerál Lere Anan Timur, nu’udar Xefe Estadu Maiór-Jenerál FALINTIL-Forsa Defeza Timor-Leste (F-FDTL), atu bele lori instituisaun ne’e buras liu-tan ba oin.
“Prezidente Repúblika estende Majór Jenerál Lere Anan Timur nia mandatu tuir lei haruka. Ne’e ha’u nia interpretasaun klaru iha instituisaun F-FDTL nian. Ha’u hanesan Komandante Supremu Forsa Armada hakarak figura ida ne’ebé lidera instituisaun ne’e bele buras ba oin,” dehan PR Lú Olo ba jornalista iha Salaun Katedrál, Vila-Verde, Dili, sábadu ne’e.
Xefe Estadu hato’o lia hirak ne’e hodi hatán ba preokupasaun públiku nian, ne’ebé lamenta ho desizaun PR ne’ebé estende tan mandatu Majór Jenerál Lere Anan Timur.
PR Lú Olo dekreta kontinuidade mandatu ba Majór Jenerál Lere Anan Timur, nu’udar Xefe Estadu Maiór-Jenerál FALINTIL-Forsa Defeza Timor-Leste (F-FDTL), liuhusi Dekretu Prezidensiál ne’ebé publika iha 14 juñu 2019, Serie I, númeru 23 A, hahú sura hosi 6 outubru 2018.
Antes ne’e, molok Lere ramata iha 6 outubru 2018, Xefe Estadu konsulta ho Konsellu Superiór Defeza no Seguransa hodi rona hanoin hosi ninian membru sira.
Hafoin mandatu Majór Jenerál Lere Anan Timur ramata tinan rua nian (2015-2017), nu’udar Komandante Superiór Forsa Armada, PR renova ninia mandatu hosi 6 outubru 2017 to’o 6 outubru 2018.
Jornalista: Hortençio Sanchez
Editór: Xisto Freitas
