DILI, 13 agostu 2019 (TATOLI)-Governu Konstitusionál Daualuk, ohin, ofisialmente lansa ona Sensu Agríkola dahuluk ne’ebé realiza iha Timor-Leste, nune’e iha loron 14 agostu hahú ona atividade ne’e.
Sensu Agríkola 2019 ne’e hala’o hafoin Timór-Leste hamriik mesak nu’udar nasaun soberana ida, maski iha tinan sira antes Governu liuhosi Ministériu Finansa realiza ona sensu umakain.
Sensu agríkola 2019 ne’e, lansa hosi Ministru Agrikultura no Peska, Joaquim José Gusmão dos Reis Martins, ne’ebé mós reprezenta Primeiru-Ministru (PM), Taur Matan Ruak, Ministra Finansa interina, Sara Lobo Brites, akompaña hosi Prezidente Tékniku Sensu Agríkola 2019, Elias dos Santos Ferreira, no Sekretáriu Estadu Formasaun Profisionál no Empregu (SEFOPE), Julião da Silva.
“Sente onra boot tanba bele reprezenta Primeiru-Ministru hodi halo lansamentu nasionál ba Sensu Agríkola 2019. Sensu ne’e nu’udar sensu dahuluk depois ita-nia rain hetan independénsia, ho rezultadu sensu ne’ebé ita atu halo daudauk ne’e, ita sei bele hetan dadus ne’ebé maka loos, dadus ne’ebé kredivel tuir padraun internasionál kona-ba setór agrikultura hodi nune’e bele sai hanesan baze ida hodi fasilita Ministériu Agrikultura no Peska ho parseiru hotu ne’ebé mak haknaar aan iha setór agrikultura”, Ministru Joaquim hatete iha lansamentu ne’e iha resintu MAP, Komoro, ohin.
Governante ne’e espera Sensu Agríkola ne’e bele sai realidade tanba iha esforsu koletivu entre Ministériu Finansa ho MAP iha nivel polítika no tékniku ho apoia mós hosi Nasaun Unida nia Organizasaun ba Ai-han no Agrikultura (FAO) inklui hamosu rezolusaun Governu iha tinan 2017, no implementasaun Sensu Agríkola hosi Sestu Governu iha maiu 2017.
Joaquim haktuir ekipa téknika hahú preparasaun dezde 2017 to’o 2018 inklui instrumentu no manuál sira hodi prepara teste ba enumeradór sira no halo mós pilotu ba Sensu Agríkola iha dezembru 2018 ho apoiu hosi FAO.
“Hau husu atu ita hotu kolabora nafatin hodi ita bele konsege finaliza tiha ita-nia Sensu Agríkola ne’e ho susesu hodi hetan dadus ne’ebé maka kredivel atu apoia dezenvolvimentu agrikultura. Sensu ne’e importante tebes ba ita nu’udar nasaun agrária ho populasaun maioria tuir sensu umakain 2015, porsentu 89,9 envolve iha vida agrikultura”, Joaquim subliña.
Biban ne’e, líder másimu MAP husu ba entidade hotu, tantu nivel nasionál no internasionál, autoridade lokál, parte seguransa no defeza atu fó apoiu másimu ba realizasaun Sensu Agríkola nune’e bele hetan dadus ne’ebé tuir realidade iha terrenu hodi bele ajuda planu Governu nian hodi halo planu ba agrikultura, peska, pekuária no floresta ho dadus ne’ebé importante no kredivel.
Husu mós ba populasaun katak atu fó resposta ho onestu, ho loloos bainhira iha loron ne’ebé determina tiha ona karik entrevistadór sira la halo vizita bele fó hatene kedas ba autoridade
Iha lansamentu ne’e, Ministru Agrikultura no Peska, Joaquim José Gusmão dos Reis Martins, Ministra Finansa interina, Sara Lobo Brites, no mós Prezidente Tékniku Sensu Agríkola 2019, Elias dos Santos Ferreira, Sekretáriu Estadu Formasaun Profisionál no Empregu (SEFOPE), Julião da Silva, entrega ekipamentu kompostu hosi tablet, no atributu ba reprezentante enumeradór, entrevistadór, no operadór GPS na’in-haat.
Notísia relevante : Prezidente Sensu Agríkola 2019 Husu Povu Agrikultór Atu Fó Resposta Klaru
Hahú Ho Komboiu Hafoin Lansa Sensu Agríkola 2019
Jornalista : Antónia Gusmão
Editora : Maria Auxiliadora
