DILI, 16 agostu 2019 (TATOLI)-Ministériu Justisa liuhusi Diresaun Nasionál Servisu Prizaun no Reinsersaun Sosiál (DNSPRS) sei halo transferénsia dadur na’in 50 to’o na’in 60 iha Prizaun Becora ba Prizaun Suai.
Notísia Relevante : Prezu 656 Halo Prizaun Becora “Over Capacity”
Desizaun ne’e hodi korresponde ba preokupasaun públiku nian kona-ba númeru dadur ne’ebé over capacity ona iha Prizaun Becora.
“Iha fin fulan ida ne’e ami sei muda tan dadur purvolta 50 to’o 60 ba prizaun Suai tanba prizaun ne’ebá bele akumula dadur to’o na’in 120,” informa Diretór Nasionál Servisu Prizaun no Reinsersaun Sosiál, Gaspar de Araújo, ohin, ba Ajénsia TATOLI iha ninia servisu fatin, Caicoli, Dili.
Nia esplika, Prizaun Suai iha bloku tolu no sela lima hodi akumula dadur to’o ema na’in 120 no daudaun ne’e iha ona dadur na’in 46 maka okupa ona hodi kumpre pena.
“Prizaun Suai iha ona ekipamentu konjeladór hodi rai hahán no foin lalais halo ona manutensaun ba karreta prizaun nian,” informa Gaspar de Araújo.
DNSPRS identifika ona dadur ne’ebé maka atu muda ba Prizaun Suai ho ninia área jurizdisaun mai husi Munisípiu Bobonaro, Covalima, Manufahi no Ainaro ho intensaun atu fasilita kobertura família dadur sira bele hala’o vizita.
Gaspar de Araújo fiar katak, ho planu transferénsia ne’e sei diminui ona númeru dadur iha Prizaun Becora ne’ebé rejistadu to’o ohin hamutuk ema na’in 653, kompostu husi mane 651 no Feto Rua.
Iha Prizaun Becora iha mós dadur juveníl ho idade 16 to’o 21 hamutuk na’in 50. Nune’e mós iha Prizaun Gleno Munisípiu Ermera rejista dadur hamutuk 114; mane 94 ho feto 20.
Total dadur estranjeiru hamutuk 35, mak hanesan sidadaun Indonézia na’in 25, Filipina na’in lima, Xineza na’in tolu no Austrália.
Jornalista : Agapito dos Santos
Editór : Francisco Simões
