DILI, 21 agostu 2019 (TATOLI)-Komandu Polisia Nasionál Timor-Leste (PNTL) to’o ohin estabelese ona Konsellu Polisiamentu Komunitáriu (KPK) iha suku 251 hosi total suku 551 (aldeia 2,233) iha territóriu.
Notísia Relevante : Doadór Apoiu KPK To’o 2020
KPK nia misaun atu prevene kualkér aktu konflitu sivíl no halo mediasaun ba konflitu sivíl maka akontese iha bairru, aldeia no suku, hodi asegura pás no hakmatek iha komunidade nia leet.
Joven sira husi Aldeia no Suku maka hola parte iha Konsellu Polisiamentu Komunitáriu ne’ebé hetan asisténsia husi Autoridade Lokál ho Ofisiál Polisia Suku (OPS).
Xefe Departamentu Polisia Komunitáriu Nasionál PNTL, Superintendente Asistente, Antonio da Luz, hateten, KPK nia servisu ho voluntáriamente atu identifika no sai mediasaun ba komunidade bainhira mosu konflitu iha bairru laran, aldeia laran no suku laran.
“Ba oin ita sei esforsu nafatin oinsá mak atu bele servisu hamutuk ho parseiru sira atu apoiu ita hodi estabelese tan KPK iha suku sira ne’ebé seidauk estabelese,” hateten Superintendente Asistente Polisia, Antonio da Luz , ohin, iha Otél Beach Garden, Dili.
Nia esplika , servisu KPK durante ne’e, lao di’ak tanba hetan kooperasaun no koordenasaun entre OPS no Autoridade lokál hodi kontribui ba asegura pás no hakmatek.
“Ita fó formasaun ba Ofisiál Polisia Suku (OPS) ne’ebé mak koloka iha territóriu laran no mós liuhusi apoiu programa Polisiamentu Komunitáriu ita konsege estabelese KPK hodi kontribui ba servisu Polisia nian liuliu asegura pás no estabilidade iha suku no aldeia,” nia tenik tan.
Maske KPK fó ona kontribuisaun másimu durante ne’e maibé seidauk hetan atensaun husi instituisaun hodi fó insentivu ruma ba sira.
“Ita nia membru KPK ne’e oferese servisu ho voluntáriu la hetan insentivu ruma husi instituisaun, ” hateten Antonio da Luz.
Jornalista : Nelson de Sousa
Editór : Francisco Simões
