Ponte B.J Habibie Nu’udar Priviléjiu Ba Indonézia

DILI, 29 Agostu 2019 (TATOLI) – Ministru Obra Públika no Abitasaun Indonézia, Mochamad Basoeki Hadimoeljono, hatete Prezidente Repúblika, Joko Widodo, sente priviléjiu ho Estadu Timor-Leste, tanba deside tau naran Bacharuddin Jusuf Habibie ba ponte iha área Bidau Santa-Ana, postu administrativu Kristu Rei.

Ministru Obra Públika no Abitasaun Públika Indonézia, Basuki Hadimuljono. Imajen Egas Cristovão

“Prezidente sente kontente tebes hodi orienta ha’u reprezenta. Ami sente ida ne’e priviléjiu boot ida ba Estadu Indonézia, no ohin mai ami hamutuk ho Dr. José Ramos Horta no reprezentante Organizasaun Nasaun Naklibur sira (ONU-sigla portugés) Ian Martin, hodi inagura ponte ne’e”, dehan nia ba jornalista sira iha aeroportu Prezidente Nicolau Lobato Komoro, ohin.

Nia dehan Xefe Estadu Indonézia, Jokowi, la marka prezensa iha seremonia ne’e tanba foka hela problema Estadu nian.

Mezmu la marka prezensa, maibé Prezidente Repúblika Indonézia kongratula povu no Estadu Timor-Leste tanba selebra sira ninia aniversáriu referendu no prezensa INTERFET ba dala 20.

Eis Prezidente RDTL, Ramos Horta (loos) akompaña husi Prezidente Parlamentu Nasionál Portugál, Eduardo Ferro Rodrigues (karuk ) no Ministru Obra Públika no Abitasaun Públika Indonézia, Basuki Hadimuljono (hamrik hosi liman loos) no Ministru Negosiu Estranjeiru no Kooperasaun, Dionísio da Costa Babo Soares (hamrik hosi liman karuk), haree ponte B.J. Habibie. Imajen Egas Cristovão

Mochamad Basoeki Hadimoeljono haktuir mensajen hosi Jokowi, katak hakarak atu hametin liután kooperasaun iha setór ekonómia, edukasaun, defeza no seguransa, liliu iha área fronteira.

Dadaun ne’e Nasaun rua iha relasaun ida di’ak no hatudu ona ezemplu ba mundu, maske iha sira ninia istória pasadu ida moruk.

Jornalista: Eugénio Pereira

Editora: Rita Almeida