PETERBOROUGH, 4 setembru 2019 (TATOLI) – Timoroan sira ne’ebé agora daudaun hela iha Peterborough selebra tinan 20 konsulta populár ho atividade kultura no desportiva.
Konviviu entre komunidade timoroan ho autoridadi lokál Peterborough iha komemorasaun ne’e hetan animasaun hosi grupu tebedai no akustik Timor Peterborough inklui aprezenta ai-han tradisionál Timor nian hanesan ai-farina, fehuk, hudi-dan, batar-dan, katupa no seluk tan nakonu iha meza leten.
Asosiasaun Desportiva Timorense (ADT) iha Inglaterra, mós organiza tebebola ne’ebé halibur ekipa 12 mai hosi Crewe, Oxford, Hungtindon, Great Yarmouth, Cambridgeshire. Torneio tebebola ne’e realiza iha kampu Embankment Peterborough, sábadu 31 agostu.
Mayor Peterborough Councillor, Gul Nawaz, Deputy Mayor, Diana Lamb, reprezentante embaixadór Timor-Leste iha Inglaterra, Gilson Ramos, Peterborough City Council, Polísia no komunidade hola parte iha selebrasaun ne’ebé hala’o iha Town Hall Peterborough, 30 agostu foin lalais ne’e.
“Sente haksolok bele hamutuk ho komunidade timoroan Peterborough ne’ebé selebra loron istóriku povo Timor nian”, hatete Gul Nawaz durante selebrasaun ne’e.
Nia hatutan: “Peterborough hanesan sidade ne’ebé kompostu hosi komunidade oioin i haksolok tebes haree timoroan moris no servisu iha Peterborough”.
Nune’e mós Gilson Ramos hato’o parabéns ba timoroan hotu, no sira ne’ebé hela iha Peterborough tanba inisia komemorasaun ne’e.
“Votasaun iha konsulta populár tinan 20 liubá muda kompletamente timoroan hotu ninia moris hodi sai di’ak liu, tanba ne’e hamutuk ho komunidade timoroan iha Reinu Unido hakarak hato’o parabéns ba povo Timor tomak, parabéns ba komunidade Timor iha Peterborough, inisitiva furak organiza komemorasaun 30 agostu”, afirma.
Celso Oliveira, Prezidente komunidade Timoroan iha Peterborough, hato’o mós obrigadu ba autoridade lokál komunidade ne’ebé sempre suporta bainhira hetan susar.
“Hakarak fó obrigadu barak ba committee management, voluntáriu sira, grupu desportivu, grupu feto, grupu liturjíku no grupu foin-sa’e hotu ne’ebé durante tinan barak nia laran dedika sira ninia tempu, hanoin no enerjia hodi servisu ba komunidade Timor ho voluntariamente”, katak tan.
Nia realsa: “Ha’u nia mensajen mak ne’e hanesan la’o rai, imigrante, traballadór, estudante, ita ida-idak servisu hakmatek hodi hadi’a ita ninia moris iha rai ida ne’e no mós iha Timor-Leste”.
Oras ne’e daudaun, Timoroan besik atus hitu moris no servisu iha sidadi Peterborough. Inan aman servisu hikis kosar ben iha fabrika, oan sira estuda iha eskola primária, sekundária, koléjiu no universidade.
Kontribuinte: Celso Oliveira
Editora: Rita Almeida
