iklan

JUSTISA, LIQUIÇÁ

DTP Liquiçá Laiha Koñesimentu Prezensa Kompañia Marino Enterprise

DTP Liquiçá Laiha Koñesimentu Prezensa Kompañia Marino Enterprise

Diretór Terra Propriedade Munisípiu Liquiçá, Tito Serrão da Silva, hatudu relatóriu kona-ba estatutu rai iha ninia k'nar fatin, kuarta (11/9). Imajen TATOLI/ Eugenio Pereira

LIQUIÇÁ, 11 setembru 2019 (TATOLI) – Diresaun Terra Propriedade (DTP) no Servisu Kadastrál Munisípiu Liquiça, laiha koñesimentu ba prezensa kompañia Marino Enterprise ne’ebé ke’e fatuk iha aldeia Mota Ikun, suku Mota Ulun, Postu Administrativu Bazartete, Munisípiu Liquiçá.

“Terra Propriedade Liquiçá laiha koñesimentu ba empreza Marino Enterprise, ne’ebé kestiona ke’e fatuk iha iha Aldeia Mota Ikun. Ami iha koñesimentu mak kompañia China Harbour tanba hato’o ofisialmente no submete ninia dokumentu pedidu ba ke’e fatuk iha área refere, liuhosi diresaun hodi utiliza ba konstrusaun Portu Tibar’’, informa Diretór Terra Propriedade Munisípiu Liquiçá, Tito Serrão da Silva, ba Agência TATOLI, kuarta ne’e.

Nia dehan, rai iha área explorasaun ke’e fatuk ne’ebé kompañia reklama konsidera nu’udar área domíniu Públiku Estadu nian, tanba haree hosi natureza rasik labele sai direitu privadu ba sidadaun ida nian tanba rai refere aibubur-laran no foho-lolon.

Área produsaun ke’e fatuk iha área Kaitehu, aldeia Mota Ikun, suku Mota Ulun, Postu Administrativu Bazartete, Munisípiu Liquiçá. Imajen TATOLI/Eugenio Pereira

Tuir dokumentu ne’ebé Agência TATOLI asesu husi DTP no Servisu Kadastrál  Munisípiu Liquiça, hasai karta ida iha 31 janeiru 2019 ho númeru referénsia 26.530.05/DNTP/I/2019, rekoñese de’it kompañia China Harbour mak ke’e fatuk iha área Kaitehu, la’ós kompañia Marino Enterprise.

China Harbour Hasoru Autoridade Liquiçá Antes Hala’o Projetu

Iha loron 14 abríl 2018, ekipa hosi DTP, ne’ebé lidera hosi Gabriel (matebian), ho kompañia China Harbour hasoru malu ho Administradór Munisípiu Liquiçá, Domingos da Conçeição dos Santos, hodi hato’o informasaun kona-ba projetu ke’e fatuk iha área Kaitehu, aldeia Mota Ikun, Suku Mota Ulun hosi kompañia China Harbour, ba konstrusaun Portu Tibar.

Notísia Relevante: China Harbour Halo Ona Rebentamentu Fatuk Dahuluk Iha Suku Mota Ulun

Iha enkontru ne’e, hetan apoiu tomak hosi Administradór Munisípiu Liquiçá, no Diretór SAIM Munisípiu Liquiçá ba atividade refere.

Hosi rezultadu enkontru ho Administradór Munisípiu, iha loron 23 abríl 2018, Diretór SAIM Munisípiu Liquiçá, konvoka enkontru ida iha Aula SAIM, hodi kompañia China Harbour halo aprezentasaun ba planu konstrusaun Portu Tibar, ne’ebé presiza Ke’e fatuk hodi ateru tasi, ba konstrusaun Portu Tibar.

Hosi aprezentasaun ne’e, iha loron 25 abríl 2018, liña setorál sira hotu hanesan Xefe Aldeia Mota Ikun, Xefe Suku Mota Ulun, Administradór Postu Bazartete, ekipa tékniku hosi Diresaun Nasionál ho Kompañia China Harbour hala’o identifikasaun no halo levantamentu tékniku kadastrál ba área ne’ebé kompañia China Harbour atu ke’e Fatuk ba.

lha altura ne’ebá, ekipa integradu hosi munisípiu hamutuk ho ekipa tékniku hosi Diresaun Nasionál tun identifika no halo levantamentu tékniku iha terrenu mak foin haree, katak iha ema (empreza) balun foin ke’e fatuk foun, ho tempu iha loron ida deit iha área kompañia China Harbour nian.

DTP La konsidera Karta Marino Enterprise

Diretór Terra Propriedade Munisípiu Liquiçá, Tito Serrão da Silva, dehan nia parte foin simu karta ida hosi kompañia Marino Enterprise ho asuntu koñesimentu atividade ke’e fatuk iha área Kaitehu, anexa kedas ho dokumentus akta fa’an no sosa rai no kuitansi ne’ebé asina (simu) hosi Mário Abílio ho montante $ 15.000, anexa kedas ho NIP deklarante sira nian.

Nia hatutan: “Tuir prosedimentu administrativu sidadaun ne’ebé de’it mak submete nia dokumentu  pedidu ba dahuluk no hetan koñesimentu hosi autoridade munisípiu, ida ne’e mak ita konsidera. Tan ne’e mak ita la konsidera kompañia Marino Enterprise nia okupasaun iha terrenu tanba la prienxe rekezitu administrativu ne’ebé iha. Prienxe rekezitus mak kompañia China Harbour’’.

Tanba ne’e loron 30 janeiru 2019, Terra Propriedades Munisípiu, Xefe Aldeia Mota Ikun no Xefe Suku Mota Ulun, ema ne’ebé fa’an rai (Mário Abílio) no nia aman, Abílio Mário hamutuk ho ekipa tékniku hosi Diresaun Nasionál no Kompañia China Harbour ba identifika rai ne’ebé Mário Abílio fa’an.

Nia realsa, iha terrenu hatudu katak hosi deklarante ne’ebé fa’an rai ba Marino Enterprise ne’e, iha de’it na’in-tolu.

“Razaun ita Ia konsidera presensa Marino Enterprise, tanba antes ne’e, kompañia ne’e, seidauk submete nia dokumentus rekerimentu ruma, mai iha eskritóriu Diresaun Terras Propriedades Munisípiu Liquiçá, kona-ba utilizasuan rai ba aktividades ke’e fatuk iha Kaitehu, foin iha loron 13 de jullu de 2018, lorokraik mak ita foin simu karta ida hosi kompañia Marino Enterprise, ho asuntu, koneñsimentu atividade ke’e fatuk iha area Kai-Tehu’’, dehan Diretór ne’e.

Nune’e, iha loron 14 setembru 2018, mak DTP Liquiçá foin simu tan karta ida husi Marino Enterprise ho asuntu “Pedido do Uso de Terreno do Governo”.

“Karik lian bahasa dehan terlambat sudah, tanba China Harbour nia prosesu hotu ona mak ita foin submete ita-nia pedidu ba Governu. Iha parte seluk kompañia China Harbour mós halo tiha ona kontratu no pagamentu ba ema sira ne’ebé nia rai tama iha área China Harbour projetu ne’e’’, hateten  Diretór Terras Propriedades Munisípiu Liquiçá, Tito Serrão da Silva.

Entretantu, Diretór Terra Propriedade Munisípiu Liquiçá, Tito Serrão da Silva, sei aprezenta relatóriu ba Ministru Justisa, Manuel Cárceres.

Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!