DILI, 13 setembru 2019 (TATOLI) – Advogadu Privadu nu’udar Defeza ne’ebé fó asisténsia legál ba kompañia Marino Enterprise, Pedro Aparicio Guterres, seidauk bele fó klarifikasaun ba disputa ria iha Aldeia Mota ulun, Suku Mota ikus, Postu Administrativu Bazartete, Munisípiu Liquiça, tanba nia sei pasa ferias iha Portugal.
Notísia Relevante : Estadu Sei Halo Rekursu Ba Disputa Rai Kaitehu
Hatán ba Ajénsia TATOLI via mensajen WhatsApp, ohin, Pedro Aparicio hateten, nia seidauk bele fó resposta ba disputa rai kompañia internasionál China Habour utiliza ba produsaun britas mezmu iha tiha ona desizaun Tribunal katak, rai refere pertensia ba kompañia Marino Enterprise.
“Segunda de’it mak ha’u halo konferénsia imprensa, tanba Domingu mak ha’u foin to’o fali iha timor husi ha’u nia ferias iha Portugal agora,” hateten Pedro Aparicio Guterres.
Notísia Relevante : Disputa Rai Kaitehu, MJ Promete Sobu “Mafia” Justisa
Nia dehan, mezmu Komandante Ein-Xefe FALINTIL, Kay Rala Xanana Gusmão, uza ‘nervozu” sobu ona lutu sira ne’ebé nia kliente sira nu’udar rai na’in monta, maibé nia sei lakohi ko’alia buat ida kona-ba aktu ida ne’e tanba sei iha hela ferias nia laran.
Iha biban seluk, bainhira jornalista sira tenta konfirma ho juis kaer prosesu Maria Modesta no Juis Administradór Distritu Dili, Jose Maria hodi konfirma kazu ne’e, sira hateten de’it katak kuandu desizaun Tribunal iha ona, nu’udar juis labele fó sai buat ruma tanba lei la permite. Maibé, kuandu hakarak halo konfirmasaun detalladu bele justifika iha Prezidente Tribunal Rekursu (PTR), Deolindo do Santos.
Jornalista : Domingos Piedade Freitas
Editór : Francisco Simões
