DILI, 13 setembru 2019 (TATOLI) – Sentru Lojístika Nasionál (CLN, sigla portugés) husu adisionál millaun $7 hodi sosa hare kulit no konstrui armazein iha Natarbora no Baukau.
“Ami iha tetu orsamentu ne’e millaun $2,3, ami husu tan adisionál millaun $7”, Prezidente CLN, Agostu Junior Trindade, hatete iha edifísiu Ministériu Finansa, Aitarak-Laran, ohin.
Prezidente CNL friza katak husu aumentu ne’e atu aloka ba item tolu ba bens no servisu tanba presiza orsamentu atu kompra haree kulit no halo rekrutamentu, ba kapitál dezenvolvimentu, foka ba kooperasaun Timor-Leste ho Governu Xina ba projetu harii armazein Natarbora no Baukau no kapitál menór atu sosa ekipamentu sentru lojistiku nian.
Nia adianta CLN presiza duni ekipamentu lojistiku tanba ekipamentu ne’ebé daudaun uza hela ne’e transfere husi seguransa alimentár no kondisaun ladún sufisiente.
“Ohin, ami husu adisionál hetan apresiasaun di’ak tebetebes husi ekipa KROP ne’ebé lidera husi Primeiru-Ministru Taur Matan Ruak”, nia relata.
Sobre konstrui armazein, nia afirma Primeiru-Ministru husu ba ekipa tékniku Komité Revizaun Orsamentu Polítika (KROP) sira apoiu orsamentu adisionál.
“Armazein ne’e apoiu parese husi Governu Xina, ne’ebé ita halo moru, aterra rai, kanalizasaun bee no eletrisidade de’it, ba konstrusaun ne’e Governu Xina mak halo”, katak.
Iha tinan 2020, nia dehan iha ekipa ida mai halo jestaun ba armazein hodi tau mákina atu deteta data ba foos ne’ebé rai kleur no aat ona tanba daudaun difisil atu deteta.
“Ami koko hela atu dezenvolve situasaun ne’e atu ita prevene foos dodok iha armazein laran”, akresenta.
Nia afirma foos importasaun iha armazein laiha ona, iha de’it foos-rai ho tonelada 415 no hare kulit tonelada rihun 1-resin ne’ebé iha prosesu atu dulas.
Jornalista : Florencio Miranda Ximenes
Editora : Maria Auxiliadora
