DILI, 23 setembru 2019 (TATOLI)-Komandu Polísia Nasionál Timor-Leste, Munisípiu Dili simu ona keixa hodi hein prosesa atu investiga estudante universitáriu balun ne’ebé halo agresaun fíziku hasoru inan feton Nina Dias ne’ebé sofre moras mentál.
Komandante Komandu Polísia Munisípiu Dili, Superintendente Xefe Armando Monteiro, dehan PNTL simu ona keixa husi Asosiasaun Kombatente Brigada Negra (ACBN-sigla portugés) ho Komité 12 Novembru (K12N) hodi lamenta asaun estudante baku Nina nu’udar mós feto Timor-Leste ne’ebé envolve iha kuadru rezisténsia luta ba Timor-Leste nia independénsia.
“Ami simu ona keixa ne’e. Ami konsidera kazu ne’e hanesan krime públiku, PNTL prepara ona prosesu para identifika suspeitu sira ne’e hodi husu Ministériu Públiku hasai mandadu kapturasaun”, afirma Komandante Armando ba jornalista iha Komandu PNTL Dili, ohin.
Armando dehan tan PNTL rasik preokupa bainhira haree iha mídia sosiál Facebook, estudante universitáriu sira halo agresaun fíziku ba Nina Dias besik kedas área Universidade UNITAL nian ne’ebé sai nu’udar fatin edukasaun nian.
Iha sábadu (21/09/2019), membru ACBN, Flarinando Combra, ho nia ‘camarada’ sira hato’o ona keixa ne’e ba Komandu PNTL Dili atu bele loke investigasaun profunda ba kazu ne’e no kaptura autór sira hodi hatán kona-ba sira nia hahalok ne’e tuir lei mak vigora iha Timor-Leste.
Asosiasaun Defisiente Timor-Leste (ADTL) rasik mós deklara la simu ho asaun violentu no diskriminasaun aat hasoru sidadaun defisiénsia sira iha Timor-Leste.
Jornalista : Eugénio Pereira
Editór : Francisco Simões
